સાંસદે લુણાવાડા-ગોધરા રેલમાર્ગ શરૂ કરવા કરી માગ

મહીસાગર: જિલ્લાના સાંસદ રતનસિંહ રાઠોડે જનતાના પ્રશ્નોને વાચા આપાવાની શરૂઆત કરી છે. તેમણે રેલ પ્રધાન પિયુષ ગોયલને અનુરોધ કરી લુણાવાડા-ગોધરા રેલમાર્ગને શરૂ કરવા માટે પત્ર લખ્યો છે.

પંચમહાલ લોકસભાના સાંસદ રતનસિંહ રાઠોડે બંધ પડેલા લુણાવાડા-ગોધરા રેલમાર્ગને શરૂ કરવા માટે પત્ર લખ્યો છે. તેમણે ભારતના રેલ પ્રધાવ પિયુષ ગોયલને અનુરોધ કર્યો કે, જો આ રેલમાર્ગ સેવા શરૂ કરવામાં આવશે, તો બંન્ને જિલ્લાના લોકો એકબીજા સાથે સીધા જોડાઈ જશે. લુણાવાડા મહિસાગર જિલ્લાનું અને ગોધરા પંચમહાલ જિલ્લાનું મુખ્ય મથક છે. જે બંન્નેને એક બીજા સાથે સીધા જોડી શકશે.

રેલ સેવા શરૂ કરવા માટે પત્ર

પંચમહાલમાંથી અલગ થઇને મહિસાગર જિલ્લાની રચના કરવામાં આવી. જેથી મહિસાગર જિલ્લાના લોકોની પંચમહાલમાં અવર-જવર થતી હોય છે. આ ઉપરાંત લુણાવાડા અને આસ-પાસના લોકોને રેલવેમાં યાત્રા કરવા માટે ગોધરા જવું પડતું હતું. કારણ કે, ગુજરાતની બહાર જવા માટે ગોધરાથી ટ્રેન પકડવી પડતી હતી.

લુણાવાડાથી ગોધરાનું અંતર 42 કિલોમીટર હોવાના કારણે પ્રવાસીઓ ટ્રેન ચુકી જતા હોય છે. જો આ રેલમાર્ગ પર રેલવેની સેવા શરૂ કરવામાં આવે તો લુણાવાડાની આસપાસની જનતાને ગોધરા જંકશન પહોંચવા માટે સારી સુવિધા થઈ શકે તેમ છે.

આ પત્રમાં લખવામાં આવ્યું કે, આ ભૂમિ રેલમાર્ગ માટે ફાળવેલી છે. ઉપરાંત આ માર્ગ ઉપર નદી, નાળા અને પુલનું નિર્માણ થયું છે. જેથી અહીંયા રેલમાર્ગ બનાવવા માટે વધારે ખર્ચ નહીં થાય. કારણ કે, આ માર્ગની સંરચના તૈયાર છે. ફક્ત પાટાઓ પાથરીને રેલ સેવા શરૂ કરી શકાશે.