ગોધરા નજીક ખેરોલ માતાના મંદિરે અષ્ટમીના દિવસે ભક્તોએ કર્યા દર્શન

ગોધરાઃ નવરાત્રીનો તહેવાર હવે અંતિમ ચરણમાં છે. નવરાત્રીની આઠમનું વિશેષ મહત્વ રહેલું છે. પંચમહાલ જિલ્લાના ગોધરા તાલુકાના ગઢ ચુંદડી ગામે ખેરોલ માતાનું પૌરાણિક મંદિર આવેલું છે. જયાં અષ્ટમીની ઉજવણી કરી માઈ ભકતોએ શીશ ઝુકાવી ધન્યતા અનુભવી હતી.

પંચમહાલ જિલ્લાના ગોધરા તાલુકાના ગઢ ચુંદડી ગામે ખેરોલ માતાનું પૌરાણિક મંદિર આવેલું છે. જંગલમાં વિશાળ પથ્થરોની ટેકરી ઉપર આવેલા આ મંદિર માઈ ભક્તોનું આસ્થાનું કેન્દ્ર છે. અહીં શીલાની નીચે ગુફામાં ખેરોલ માતાની સ્વયંભૂ મૂર્તિ બિરાજમાન હતી. ત્યારબાદ અહીં ગ્રામજનો દ્વારા મંદિર બનાવવામાં આવ્યું હતું. માતાના મંદિરની આસપાસ નાના-નાના ડુંગર આવેલા છે. નવરાત્રીંમાં અષ્ટમીના દિવસે માઇભકતો દર્શનાર્થે ઉમટી પડ્યા હતા.

આ મંદિર સાથે લોકવાયકાઓ જોડાયેલી છે. કહેવાય છે કે અંબા માતા, કાળકા માતા અને ખેરોલ માતા ત્રણ બહેનોમાંથી ખેરોલ માતા અહીં રોકાઈ ગયા હતા. ત્યાર બાદ મંદિરની સ્થાપના કરવામાં આવી હતી. સ્થાનિક ગ્રામજનોની અતુટ શ્રદ્ધા અને વિશ્વાસથી માતાજી દરેક ભક્તોની ઈચ્છા પૂરી કરે છે. તંત્ર દ્વારા આ ખેરોલ માતાના મંદિરનો વિકાસ કરી તેને ધાર્મિક સ્થળ તરીકે વિકસાવવામાં આવે તેવી પણ સ્થાનિકો દ્વારા માગ કરવામાં આવી છે.