પંચમહાલ: કાલોલ તાલુકામાં ખાણ ખનીજ વિભાગનો સપાટો, 45 લાખનો મુદ્દામાલ ઝડપાયો

પંચમહાલ: કાલોલ તાલુકાના ભૂખી ગામેથી રેતીનું ગેરકાયદેસર વર્ગીકરણ તેમજ રેતીનો પાવડર બનાવી તેની નિકાસ કરતો પ્લાન્ટ પંચમહાલ ખાણ ખનીજ વિભાગ દ્વારા ઝડપી પાડવામાં આવ્યો છે. બાલાસિનોરના ઇસમ દ્વારા ખાણ ખનીજ વિભાગની પૂર્વ મંજૂરી મેળવ્યા વગર જ આ સમગ્ર પ્લાન્ટ ચલાવવામાં આવતો હોવાની વિગતો મળી છે. આ ઇસમ સામે હાલ કાયદેસરની કાર્યવાહી હાથ ધરવામાં આવી છે.

પંચમહાલ જિલ્લામાં ખનીજ પેદાશોનું ગેરકાયદેસર ખનન કરી તેની હેરાફેરી કરવાની અવારનવાર ફરિયાદો ઉઠતી હોય છે. ખાણ ખનીજ વિભાગ દ્વારા આ અંગે સમયાંતરે કાર્યવાહી પણ કરવામાં આવતી હોય છે, ખનીજ વિભાગના અધિકારીઓને મળેલી ફરિયાદના આધારે ખાનગી રસ્તાનો ઉપયોગ કરી કાલોલ તાલુકાના ભૂખી ગામે રેડ પાડવામાં આવતા સ્થળ પરથી રેતીનું ગેરકાયદેસર ખનન કરી લાવી તેનો ગેરકાયદેસર સંગ્રહ કરવામાં આવ્યો હોવાની વિગતો મળી હતી.

અધિકારીઓ દ્વારા આ અંગે વધુ તપાસ કરાતા સંગ્રહિત રેતીનું વર્ગીકરણ કરી તેમાંથી અલગ અલગ પ્રકારની રેતીનો પાઉડર બનાવી તેની નિકાસ કરવામાં આવતી હોવાનું તેમજ પાઉડર બનાવવા માટેનો પ્લાન્ટ પણ ખાણ ખનીજ વિભાગને મળી આવ્યો હતો. આથી આ સમગ્ર મામલે ખાણ ખનીજ વિભાગ દ્વારા રેતીનું વહન કરવા માટે ઉપયોગમાં લેવાતા 3 ટ્રેકટર, 1 ટ્રક તેમજ પ્લાન્ટને સીઝ કરી હાલ કુલ 45 લાખનો મુદ્દામાલ ઝડપી પાડવામાં આવ્યો છે. તપાસ દરમ્યાન બાલાસિનોરનાં ઇસમ દ્વારા ખાણ ખનીજ વિભાગની પૂર્વ મંજૂરી મેળવ્યા વગર જ આ સમગ્ર પ્લાન્ટ ચલાવવામાં આવતો હોવાની પણ વિગતો મળી છે. આ ઇસમ સામે હાલ કાયદેસરની કાર્યવાહી હાથ ધરવામાં આવી છે.