મહીસાગર: બાળકોમાં રહેલી કળા વિકસે અને સાંસ્કૃતિક વારસાનું જતન થાય તેવા હેતુથી રમત-ગમત યુવા અને સાંસ્કૃતિક પ્રવૃતિ વિભાગ ગાંધીનગર અને જિલ્લા વહીવટી તંત્ર ગોધરા પંચમહાલના સંયુકત ઉપક્રમે જિલ્લા કક્ષાના કલા મહાકુંભ 2020નું આયોજન ગોધરા ખાતે આવેલી સાંદિપની વિદ્યાલયમાં કરવામાં આવ્યું હતું. જેમાં તાલુકા કક્ષાની વિવિધ સ્પર્ધામાં ભાગ લઇ વિજેતા થયેલા વિધાર્થીઓએ ભાગ લીધો હતો.
આ કલા મહાકુંભમાં વકૃત્વ સ્પર્ધા, નિબંધ, ચિત્રકલા, લોકનૃત્ય, રાસ-ગરબા, સુગમસંગીત, લગ્ન ગીતો, સમુહ ગીતો, ભરતનાટયમ, તબલા, હાર્મોનિયમ, એકપાત્રિય અભિનય, આદિવાસી નૃત્ય, લોકગીત-ભજનની કૃતિઓ જેવી વિવિધ સ્પર્ધાઓ રાખવામાં આવી હતી. આ કાર્યક્રમમાં સમગ્ર જિલ્લાની વિવિધ શાળાના વિધાર્થીઓ દ્વારા ભાગ લેવામાં આવ્યો હતો. આ ઉપરાંત સ્પર્ધામાં શ્રેષ્ઠ પ્રદર્શન કરનારા વિદ્યાર્થીઓને પ્રથમ, દ્વિતીય અને તૃતીય પસંદગી કરી રોકડ પુરસ્કાર આપવામાં આવ્યું હતું.
