રાજ્ય સરકારની પ્રધાનમંત્રી વીમા ફસલ યોજના ખેડુતોને અતિવૃષ્ટી, અનાવૃષ્ટી તથા કુદરતી આફતો વખતે ખેતીના નુકસાન સામે રક્ષણ આપે છે, પરંતુ દક્ષિણ ગુજરાતના નવસારી, સુરત અને વલસાડ જિલ્લાઓના મુખ્ય પાકો ગણાતા બાગાયાતી પાકોને વીમા કવચ ન મળતા ખેડૂતોમાં નારાજગી પ્રવર્તી રહી છે. સમગ્ર દક્ષિણ ગુજરાત બાગાયાતી પાકો ખેડુતો માટે આશીર્વાદરૂપ બન્યા છે. જેમાં બાગાયાતી પાકો નિષ્ફળ જાય તો કોઈ સુરક્ષા કવચ ખેડૂતોને મળતું નથી. આ યોજના હેઠળ નવસારીના પિયત પાક ડાંગરને વીમા કવચ આપવામાં આવ્યું છે, જેનું પ્રિમીયમ 340 રૂપિયા પ્રતિ હેક્ટર છે.
નવસારીમાં બાગાયતી પાકોને વીમા સુરક્ષાનો લાભ નથી મળતો જિલ્લાના વાંસદા, ખેરગામ અને ચીખલી તાલુકાઓમા બીનપિયત ડાંગર, જ્યારે વાંસદા તાલુકામાં અડદ અને તુવેરને પાક વીમા યોજનામાં ગણી લેવામાં આવ્યા છે. જેનું પ્રિમીયમ 120 રૂપિયા પ્રતિ હેક્ટર નક્કી કરવામા આવ્યું છે. નવસારીમાં જિલ્લામા 70 હજાર હેક્ટરમાં બાગાયાતી પાકો અને અન્ય શાકભાજીના પાકો પણ લેવાય છે. ખેડૂતોની માંગણી હોવા છતાં આ પાકને વીમાની સુરક્ષામાં લેવામાં આવ્યા નથી. જિલ્લામાં અંદાજે 40 હજાર હેક્ટરથી વધુ જમીનમાં આ પાક લેવાય છે જેમાં 30 હજાર હેક્ટરમાં કેરીનો પાક લેવાય છે.
ખેતીના પાકો માટે વીમા સંરક્ષણ ખેડૂતોને મળે તે માટે સરકારે ‘પ્રધાનમંત્રી ફસલ વીમા યોજના’ જાહેર કરી છે. આ યોજના અંતર્ગત સરકારે નોટીફાઈડ કરેલા ખેતીના પાકોને વીમા સંરક્ષણ આપવામાં આવે છે. અહીંના નવસારી જિલ્લામાં પણ આ યોજના અમલી છે. જો કે, હજુ સુધી જિલ્લામાં યોજનાનો લાભ ખૂબ ઓછા ખેડૂતોને થયો છે. તેનું એક કારણ નોટિફાઈડ કરેલા પાકો છે. જેમાં ડાંગર (પિયત) અને ડાંગર (બિનપિયત), તુવેર અને અડદનો જ સમાવેશ કરવામાં આવ્યો છે.
