ગણદેવી નગરપાલિકાના કારોબારી અધ્યક્ષ મુનાફ માસ્તરનું નિધન

ગણદેવી નગરપાલિકાના કારોબારી પ્રમુખ અને સાચા અર્થમાં લોકસેવક મુનાફ માસ્તરનું કોરોનાની સારવાર દરમિયાન અવસાન થયુ છે. સેવાભાવી વ્યક્તિત્વ ધરાવતા મુનાફ માસ્તરના અવસાનથી ગણદેવી ભાજપ સહિત પંથકમાં શોકની લાગણી પ્રસરી છે. Give the best for countryનો બનાવ્યો હતો જીવન મંત્ર.

• કોરોનાની ટૂંકી સારવાર બાદ ખાનગી હોસ્પિટલમાં લીધા અંતિમ શ્વાસ
• મુનાફ માસ્તરના અવસાનથી ગણદેવી ભાજપ સહિત પંથકમાં શોકની લાગણી
• ગણદેવીએ એક સેવાભાવી વ્યક્તિત્વ ગુમાવ્યુ
• ગણદેવીને બનાવી હતી કર્મભૂમિ

નવસારી :નવસારી જિલ્લામાં દિવસેને દિવસે કોરોના વિકરાળ બની રહ્યો છે, જેમાં અનેક લોકોએ જીવ પણ ગુમાવ્યા છે. ગણદેવીના કર્મઠ ભાજપી કાર્યકર અને હંમેશા લોકોની સેવામાં તત્પર રહેનારા મુનાફ માસ્તર ત્રીજીવાર ગણદેવી નગરપાલિકાના કોર્પોરેટર તરીકે ચૂંટાયા હતા. ગણદેવીમાં સત્તા સંભાળ્યા બાદ ભાજપે મુનાફ માસ્તરને કારોબારી અધ્યક્ષની જવાબદારી સોંપી હતી. give the best for countryના જીવનમંત્ર સાથે કામ કરતા માસ્તર હંમેશા લોકસેવામાં અગ્રેસર રહ્યા હતા. જેઓ ચાર દિવસ અગાઉ કોરોનાની ઝપેટમાં આવતા તેમને સારવાર અર્થે આલીપોરની ખાનગી હોસ્પિટલમાં ખસેડાયા હતા. જ્યાં આજે કોરોનાની ટૂંકી સારવાર બાદ મુનાફ માસ્તરે અંતિમ શ્વાસ લીધા હતા.

ગણદેવી નગરપાલિકાના કારોબારી અધ્યક્ષ મુનાફ માસ્તરનું નિધન

આ પણ વાંચોઃઇતિહાસકાર અને પદ્મશ્રી યોગેશ પ્રવીણનું નિધન થયું

મૂળ નર્મદા જિલ્લાના મુનાફ માસ્તરે ગણદેવીને પોતાની કર્મભૂમિ બનાવી હતી. સિવિલ એન્જિનિયરની ડિગ્રી મેળવ્યા બાદ, તેમણે ગણદેવી તાલુકામાં આઠ મોટા બિલ્ડીંગ પ્રોજેક્ટ કર્યા હતા. સાથે જ સમાજના દરેક વર્ગને શિક્ષણ મળે એ હેતુથી મોર્ડન પબ્લિક સ્કુલની સ્થાપનામાં પાયાના પથ્થર રહ્યા હતા. ઉલ્લેખનીય છે કે, ગણદેવી ભાજપમાં બીજા મોટા ગજાના નેતાના અવસાનથી ભાજપ પરિવાર સાથે સમગ્ર ગણદેવી પંથકમાં શોકની લાગણી પ્રસરી છે.