નર્મદા જિલ્લામાં "બેટી બચાવો બેટી પઢાવો" પ્રધાનમંત્રી યોજનાના નામે વેંચતા ફોર્મ બોગસ

નર્મદા: "બેટી બચાવો બેટી પઢાવો" પ્રધાનમંત્રી યોજનાના નામે લોકો વચ્ચે ફોર્મ વહેંચવામાં આવ્યા હતા.શાતિર દિમાગના વ્યક્તિએ આખી યોજના ચલાવી હતી જેમાં દીકરીના પિતાને જ્યારે દિકરી 18 વર્ષની થાય તો પિતાને 2 લાખ રૂપિયા સહાય મળશે.

આ ચ્રર્ચા સાંભળીને નર્મદા જિલ્લાના હજારો લોકોએ ફોર્મ મેળવવા પડાપડી કરી હતી. આ ફોર્મ ભરવા માટે 100 થી 200 રૂપિયા પણ પડાવ્યા હતા.આ ભરેલા ફોર્મ કેન્દ્રીય મહિલા કલ્યાણ વિભાગને દિલ્હી મોકલવા માટે પોસ્ટ ઓફિસોમાં ભારે ધસારો થતા જ આખી વાત બહાર આવી હતી.ઉલ્લેખનીય છે કે આ ફોર્મમાં પાલીકા પ્રમુખ અથવા તલાટીના સહી સિક્કા પણ કરાવી લેવાયા હતા.ત્યાં સુધી કોઈને ગંધ આવી ન હતી.એક સામાજિક કાર્યકરે જિલ્લા કલેકટરને ફરિયાદ કરતા જ તેઓએ જિલ્લા આરોગ્ય વિભાગને પોલીસ સ્ટેશનમાં ફરિયાદ આપવાનું કહેતા જ જિલ્લા આરોગ્ય અધિકારી એ રાજપીપળા પોલીસ સ્ટેશનમાં જાણવાજોગ અરજી કરી છે.તો કલેક્ટરે કહ્યું હતું કે,જો કોઈ ફોર્મ વેંચતા પકડાશે તો કાયદેસરની કાર્યવાહી કરવાની તૈયારી રાખવી પડશે.