ટંકારાના સજ્જનપર ગામના ખેડૂતે ડ્રેગન ફ્રૂટની ખેતી થકી લખ્યો નવો અધ્યાય

મોરબી જિલ્લો ઓદ્યોગિક ક્ષેત્રે તો અગ્રેસર છે જ પરંતુ હવે શિક્ષણ અને ખેતી ક્ષેત્રે પણ કાઠું કાઢી રહ્યો છે. ખેડૂતો પરંપરાગત કપાસ, મગફળી જેવા પાકોને બદલે નવીન ખેતી કરવા માટે પ્રેરિત થઈ રહ્યા છે. જેમાં મોરબીના ખેડૂતે ડ્રેગન ફ્રૂટની ખેતી કરીને નવી રાહ ચિંધી છે. સજ્જનપર ગામના ખેડૂત મોરબી જિલ્લામાં પ્રથમ ખેડૂત બન્યા છે, જેણે ડ્રેગન ફ્રૂટની ખેતી શરુ કરી છે.

મોરબી: ટંકારા તાલુકાના સજ્જનપર ગામના રહેવાસી સતીષ ઘોડાસરાએ એન્જીનિયરિંગ સુધીનો ઉચ્ચ અભ્યાસ કર્યો છે. જોકે તેમણે નોકરી કે વેપારને બદલે ખેતી કરવાનું નક્કી કર્યું હતું. આ શિક્ષિત ખેડૂતે પરંપરાગત ખેતીને બદલે ખેતી ક્ષેત્રે ક્રાંતિ લાવવાનું નક્કી કર્યું હતું. જેથી તેમને ડ્રેગન ફ્રૂટની ખેતી શરુ કરી છે.

મોરબી જિલ્લામાં સૌપ્રથમ સતીષે અનોખું સાહસ કર્યું છે અને બે વર્ષની મહેનતના હવે મીઠા ફળ પણ મળી રહ્યા છે. જે ડ્રેગન ફ્રુટની ખેતી અંગે સતીષ જણાવે છે કે, કૃષિ મહોત્સવમાં વૈજ્ઞાનિકની સલાહ અને માર્ગદર્શન મળતા તેમને ડ્રેગન ફ્રુટની ખેતી કરવાનું નક્કી કર્યું હતું. ડિસેમ્બર 2018માં વાવેતર શરુ કર્યું હતું. 10 X 6નું વાવેતર કર્યું હતું. જે 12 X 8નું પણ કરી શકાય છે. એક પોલમાં 4 રોપા વાવી શકાય છે. જેમાં 2 વર્ષ બાદ હવે ફળ આવી રહ્યા છે. જેમાં એક પોલે 2 કિલો પાક ઉતરે છે અને 3 વર્ષ પછી 4થી 5 કિલો ફળ મળે તેવી આશા છે.

ડ્રેગન ફ્રુટની ખેતીનો નવો અધ્યાય કરવો આસાન ન હતો, આ અંગે ખેડૂત જણાવે છે કે, તેમને ડ્રેગન ફ્રૂટના રોપા હૈદરાબાદથી મગાવ્યા હતા. 1 વીઘાએ દોઢ લાખ જેટલો ખર્ચ અને સારી એવી મહેનત કરી છે. જો કે, હવે લોકલ નર્સરીમાંથી પણ રોપા મેળવી શકાય છે. આ ઉપરાંત 32 ડિગ્રી ટેમ્પરેચર સુધીનું હવામાન ડ્રેગન ફ્રૂટની ખેતીને માફક આવે છે.

મોરબી કૃષિ વિજ્ઞાન કેન્દ્રના સિનિયર વૈજ્ઞાનિક ડી. એ. સરડવાએ આ બાબતે જણાવ્યું હતું કે, મોરબીમાં ડ્રેગન ફ્રૂટની ખેતી શરુ કરીને ખેડૂતે અન્ય ખેડૂતોને નવી રાહ ચીંધી છે, તો તેમને કરેલી સફળ ખેતીએ સાબિત કર્યું છે કે, અહીનું હવામાન આ પાકને માફક આવે તેમ છે. જેથી અન્ય ખેડૂતો પણ હવે ડ્રેગન ફ્રુટની ખેતી તરફ વળશે અને સારી આવક મેળવી સદ્ધર બનશે.