મોરબી: મોરબીની માળિયા મિયાણા બેઠક મહત્વની બેઠક ગણવામાં આવે છે. મોરબી એ સિરામિકનું હબ છે. તો માળિયા તાલુકામાં મીઠા ઉદ્યોગ અને જીંગા ઉદ્યોગનો તો વિકાસ થયો છે, પરંતુ તાલુકામાં વિકાસના નામે મીંડું જોવા મળ્યું છે. તાલુકા લેવલની એક પણ સુવિધા જોવા મળતી નથી.
માળિયા તાલુકામાં 52 ગામો આવેલા છે. માળિયામાં એક પણ બસ સ્ટેન્ડની સુવિધા ન હોવાથી રોડ પર બસ સ્ટોપ આપવામાં આવ્યા છે. માળિયાથી ભુજ-અમદાવાદ અને રાજકોટ તરફ જઈ શકાય છે, પરંતુ રોડ રસ્તા બિસમાર હાલતમાં પડ્યા છે. પાયાની અસુવિધાને પગલે સ્થાનિકોને ભારે હાલાકીનો સામનો કરવો પડી રહ્યો છે. સ્થાનિકોએ પોતાની વ્યથા ઠાલવતા જણાવ્યું કેે, નેતાઓ માત્ર મત લેવા માટે જ આવે છે. કામ કરવા સમયે કોઈ સામે પણ નથી જોતું. તાલુકો પછાત હાલતમાં હોવાથી ચૂંટણીમાં એક પણ મત માળિયા તાલુકામાંથી આપવમાં નહીં આવે.
માળિયા તાલુકો વિકાસથી વંચિત, અનેક પાયાની સુવિધાનો અભાવ તાલુકામાં વર્ષ 2015-16માં 99 કામ સૂચિત કરવામાં આવ્યા હતા. આ અંગે રૂપિયા ૧૫,૯૪૦,૦૭૧ની ગ્રાન્ટ મળી હતી. જેમાંથી ૯૬ કામ પૂર્ણ થઇ ચૂક્યા છે. તો ૨૦૧૬-૧૭માં ૧૨૦ કામ માટે રૂપિયા ૨૧,૯૧૮,૮૩૩ની ગ્રાન્ટ ફાળવવામાં આવી હતી. જેમાંથી ૧૨૦ કામ પૂર્ણ થઇ ચુક્યા છેે. વધારાના ૧૬ ગામો માટે રૂપિયા ૩,૧૭૬,૧૩૧ની ગ્રાન્ટ આપવામાં આવી હતી. તેમાં પણ ૧૯ કામ પૂર્ણ થઇ ચૂક્યા છે. ૨૦૧૭-૧૮માં ૧૨૮ કામ માટે રૂપિયા ૨૫,૩૪૫,૮૮૨ની ગ્રાન્ટમાં ૧૨૮ કામો પૂર્ણ થઇ ચૂક્યા છે.તો વધારાના ૧૨ કામ માટે રૂપિયા ૨,૩૦૦,૦૭૧ની ગ્રાન્ટ આપવામાં આવી હતી. તેમાં પણ ૧૨ કામ પૂર્ણ કરી દેવામાં આવ્યા છે. ૨૦૧૮-૧૯ વર્ષ દરમિયાન ૧૩૦ કામ માટે રૂપિયા ૨૯,૧૫૦,૦૪૬ની ગ્રાન્ટ ફાળવવામાં આવી હતી. જેમાં ૧૨૨ કામ પૂર્ણ થયા છે તો ૮ કામ પ્રગતી હેઠળ છે. ૨૦૧૯-૨૦માં ૧૬૦ કામ માટે રૂપિયા ૮૯,૭૬,૨૦૫ની ગ્રાન્ટ આપવામાં આવી હતી. જેમાં ૧૨૨ કામ પૂર્ણ થયા છે. તો ૨૨ પ્રગતી હેઠળ છે તેમજ ૧૪ કામ શરૂ જ થયા નથી. તો જિલ્લા પંચાયતમાંથી પણ ૨૦૧૭-૧૮ વર્ષ દરમિયાન રૂપિયા ૪,૦૦૦,૦૦૦ની ૨૦૧૯-૧૯માં રૂપિયા ૪,૦૦૦,૦૦૦ અને ૨૦૧૯-૨૦ રૂપિયા ૮૦,૦૦૦,૦૦૦ની ગ્રાન્ટ ફાળવવામાં આવી છે.
અબજો રૂપિયાની ગ્રાન્ટ આપવમાં આવી છતાં પણ માળિયા તાલુકામાં વિકાસ જોવા મળ્યો નથી. રોડ- રસ્તા, ગટર ઉભરાવવાના પ્રશ્નો, ખેડૂતોને સિંચાઈ માટે પાણી અગવડતા, બસ સ્ટેન્ડ જેવી સુવિધાનો અભાવ છે. માળિયા ગામમાં એક પણ ATM નથી. આરોગ્યની પણ તાલુકા લેવલની સુવિધા ન હોવાથી લોકોને વાંરવાર મુશ્કેલીઓ પડી રહી છે. જ્યારે નેતાઓ વિકાસના કામોનો ગુણગાન ગાઈ રહ્યા છે.
બ્રિજેશ મેરજા જણાવે છે કે, ધારાસભ્ય પદે હતો ત્યારે વિકાસના કામોને પ્રાધાન્ય આપ્યું છે. જેમાં ગ્રામ્ય વિસ્તારના રોડ રસ્તા, નવલખી બંદરે જેટીની સુવિધા અપાવી, વાવણીયા શ્રી મદ રાજચંદ્રના જન્મભૂમીને પ્રવાસન સ્થળ તરીકે વિકસાવવા માટે પ્રયત્નો કાર્ય છે. ભુજ,અમદાવાદ અને સહિતની બસને સ્ટોપ અપાવ્યું છે. તો કોંગ્રેસના કિશોર ચીખલીયા જણાવે છે કે, ભાજપના ૨૫ વર્ષના શાસનમાં એક પણ બસ સ્ટેન્ડની સુવિધા આપવામાં આવી નથી તો ખેડૂતોને પણ સિંચાઈના પાણીની વ્યવસ્થા કરી આપી નથી.
