મોરબીઃ કોરોના વાઈરસના ફેલાવાને અટકાવવા વડાપ્રધાન નરેન્દ્ર મોદી દ્વારા સમગ્ર દેશમાં 21 દિવસના લોકડાઉનની જાહેરાત કરવામાં આવી છે. રવિવારે લોકડાઉનનો ચોથો દિવસ છે. મોરબી જિલ્લામાં લોકડાઉનનું પોલીસ દ્વારા કડક પાલન કરાવવામાં આવી રહ્યું છે. સવારના સમયે મોટી સંખ્યામાં લોકો કામ વગર બહાર નીકળતા હોય છે. તેમને પોલીસ રોકી અને કામ વગર બહાર ન આવવા સમજાવે છે. પોલીસ સંયમ જાળવી રાખી તેમને કોરોનાની ગંભીરતા સમજાવીને ઘરે પરત મોકલે છે.
મોરબી પોલીસનું માનવતાભર્યું કાર્ય, ઝૂંપડપટ્ટી વિસ્તારમાં રાશન કીટનું વિતરણ કર્યું
કોરોનાના કહેર વચ્ચે સમગ્ર દેશમાં 21 દિવસ માટે લોકડઉન છે. આ લોકડાઉનને કારણે ગરીબો રોજગારી મેળવવા બહાર જઈ શકતા નથી. જેથી રોજેરોજનું કમાનારા લોકોની હાલત કફોડી બની છે. ત્યારે લોકડાઉન દરમિયાન કોઈ ગરીબ ભુખ્યો ન રહે તે માટે મોરબી પોલીસ ઉત્તમ કામગીરી કરી રહી છે. મોરબી પોલીસ દ્વારા ઝૂંપડપટ્ટી વિસ્તારમાં રહેતા લોકોને રાશન કીટનું વિતરણ કરવામાં આવ્યું હતું. ગુનેગારોને ડામવા કઠોર જણાતી પોલીસ લોકડાઉન દરમિયાન ગરીબો માટે અન્નપૂર્ણા સમાન બની ગઈ છે.
આ લોકડાઉન વચ્ચે મોરબી પોલીસનો એક અલગ ચહેરો પણ સામે આવ્યો છે. હાથમાં લાકડી ચહેરા પર સખ્તાઈ રાખીને ફરતા પોલીસ જવાનો પથ્થર દિલના હોય છે તેવી માન્યતા લોકોના માનસ પટલ છવાયેલી હોય છે. હાલ આ ભ્રમણા તોડતા દ્રશ્યો સમગ્ર રાજ્ય અને મોરબીમાં જોવા મળી રહ્યા છે.
દેશપ્રત્યે પોતાની ફરજ નિભાવવાની સાથે સાથે માનવતાનું ઉતમ ઉદાહરણ મોરબી પોલીસ પૂરૂ પાડી રહી છે. લોકડાઉનને પગલે ઝૂંપડપટ્ટીમાં રહેતા લોકોને જીવન જરૂરિયાતની વસ્તુઓ મળી શકતી નથી. તેઓ દહાડી કરતા હોવાથી તેમની હાલત કફોડી છે. આવા સમયે મોરબી પોલીસ અન્નપૂર્ણા બની તેમની વહારે આવી છે. મોરબી પોલીસે રાશન કીટ તેમજ શાકભાજી તેમના ઘરે પહોંચાડી હતી. પોલીસના આ ઉમદા પગલાને કારણે ગરીબ પરિવારોમાં ખુશી છવાઈ હતી.