મોરબીમાં ભાજપ અને કોંગ્રેસ નેતા વચ્ચે મારામારી

ભારતની કહેવાતી લોકશાહીના રવિવારે લીરેલીરા ઉડતા જોવા મળ્યા હતા. રવિવારે ચૂંટણી ફોર્મ ચકાસણી સમયે મોરબીના તાલુકા સેવા સદન ખાતે ભાજપ અને કોંગ્રેસ આગેવાનો છુટા હાથની મારામારી પર ઉતરી આવ્યા હતા. જે બનાવને પગલે જિલ્લામાં કોંગ્રેસ પક્ષમાંથી ફોર્મ ભરનારા, જિલ્લા પંચાયત, તાલુકા પંચાયત અને નગરપાલિકાના ઉમેદવારો સાથે જિલ્લા કોંગ્રેસ પ્રમુખ કલેક્ટર કચેરી દોડી ગયા હતા અને સામુહિક ફોર્મ પરત ખેંચવાની ચીમકી સાથે કલેક્ટરને ઉગ્ર ભાષામાં રજૂઆત કરી હતી.

• સ્થાનિક સ્વરાજની ચૂંટણી ગણતરીા દિવસોમાં
• ચૂંટણી અગાઉ મોરબીમાં ભાજપ અને કોંગ્રેસ વચ્ચે બબાલ
• પોલીસે દરમિયાનગીરી કરી નેતાઓને છૂટા કર્યા

મોરબીઃ નગરપાલિકાની ચૂંટણી લડતા ભાજપ અને કોંગ્રેસ નેતા વચ્ચે રવિવારે બઘડાટી બોલી ગઈ હતી. તાલુકા સેવાસદન ખાતે મારામારીની ઘટના બની હતી. જેમાં ભાજપના દેવા અવાડીયા અને કોંગ્રેસના કનુ લાડવા વચ્ચે મારામારીના દ્રશ્યો જોવા મળ્યાં હતા. ચૂંટણી પ્રચાર મામલે બોલાચાલી થયા બાદ બન્ને નેતાઓ વચ્ચે મારામારી થઇ હતી. જેથી સ્થળ પર હાજર પોલીસે દરમિયાનગીરી કરી બન્ને નેતાઓને છોડાવ્યા હતા. જો કે, થોડીવાર માટે કચેરીએ વાતાવરણ તંગ બન્યું હતું.

કોંગ્રેસના તમામ ઉમેદવારોએ ફોર્મ પરત ખેંચી લેવા ચીમકી આપી

સેવા સદન ખાતે મારામારીની ઘટના બાદ મોરબી કોંગ્રેસ પ્રમુખ લલિત કગથરાની આગેવાની હેઠળ જિલ્લામાં જિલ્લા પંચાયત, તાલુકા પંચાયત અને નગરપાલિકામાં કોંગ્રેસમાંથી ઉમેદવારી નોંધાવનારા તમામ ઉમેદવારો કલેક્ટર કચેરી પહોંચ્યા હતા અને ફોર્મ પરત ખેંચી લેવાની ચીમકી ઉચ્ચારી હતી.

જિલ્લા કલેક્ટરે SP સાથે ચર્ચા કરવાની ખાતરી આપી

આ સમગ્ર બનાવ મામલે કોંગ્રેસની ઉગ્ર રજૂઆત બાદ જિલ્લા કલેક્ટર જે.બી.પટેલે કોંગ્રેસ નેતાઓને ખાતરી આપી હતી. જે ઘટના અંગે જિલ્લા SP એસ.આર.ઓડેદરાને બોલાવી ચર્ચા કરી સમગ્ર બનાવ અંગે માહિતી મેળવશે અને યોગ્ય પગલા ભરવા ખાતરી આપી હતી.

જિલ્લા કોંગ્રેસ પ્રમુખે ભાજપ પર ગંભીર આક્ષેપો કર્યા

આ સમયે જિલ્લા કોંગ્રેસ પ્રમુખ લલિત કગથરાએ ભાજપ પર આકરા પ્રહારો અને ગંભીર આક્ષેપો કરી જણાવ્યું હતું કે, ભાજપ ફેર ઈલેક્શન કરવા ના માંગતું હોવાથી કોંગ્રેસ તમામ ઉમેદવારોના ફોર્મ પરત ખેંચાવી લેશે. સરકારી કચેરીમાં પોલીસની હાજરીમાં કોંગ્રેસ આગેવાનોને માર મારવામાં આવતો હોય તો પ્રચાર કરવા તેના કાર્યકરો કેવી રીતે જશે.