અહીં તંત્ર ન્યાય ન આપતું હોવાના આક્ષેપ સાથે ભાઈ-બહેને આત્મહત્યાનો કર્યો પ્રયાસ

મહેસાણા: જિલ્લાના કડી ખાતે આવેલા પ્રાંત કચેરી ખાતે બે ભાઈ-બહેન દ્વારા જમીન વિવાદ મામલે તંત્ર ન્યાય આપતું ન હોવાના આક્ષેપ સાથે દવા પી લઈને આત્મહત્યા કરવાનો પ્રયાસ કરવામાં આવ્યો હતો. તો કડી પ્રાંત અધિકારી કેતકી વ્યાસ દ્વારા જમીન વિવાદ મામલે કચેરી પર અસામાજિક તત્વોની જેમ આવેલી 3 મહિલા તેમજ સાબિત 10 લોકોની સામે પોલીસ ફરિયાદ નોંધાવવામાં આવી છે.

કડી પ્રાંત કચેરી ખાતે આગોલ ગામના આત્મારામ વણકર અને તેમના બહેન ભલીબેન દ્વારા જમીન વિવાદમાં કચેરીના ધક્કા ખાઈને પરેશાન થયા હોવાના કારણે દવા પી આપઘાત કરવાનો પ્રયાસ કરાયો હતો. જોકે આ અંગે કડી પ્રાંત અધિકારી કેતકી વ્યાસ દ્વારા તેમની ચેમ્બરમાં આવેલી 3 મહિલાઓ સહિત 10 અજાણ્યા ઇસમોને બેસવાનું કહેતા અરજદાર પક્ષના માણસોએ મહિલા પ્રાંત અધિકારીને બિભસ્ત ગાળો બોલી જાનથી મારી નાખવાની ધમકી આપી હતી.

ત્યારબાદ અરજદાર મહિલાને ઝેરી દવા લાવ્યા છો એ પી જાઓ જેવી દુસ્પ્રેરણા આપી હોવાની તેમજ મહિલા પ્રાંત અધિકારીને ઓફિસમાંથી બહાર ન જવા દેવા દરવાજો બંધ કરી દેવામાં આવ્યો હોવાની ફરિયાદ કડી પોલીસ મથકે નોંધવામાં આવી છે. ત્યારે કડી પોલીસે મહિલા પ્રાંત અધિકારી કેતકી વ્યાસની ફરિયાદના આધારે 3 મહિલા સહિત 10 અજાણ્યા ઈસમો સામે કલમ 120 બી, 143, 332, 186, 504, 506 (2), 294 (ખ), 341 અને સત્તાવાર રહસ્યનો કાયદો અને 1923ની કલમ 7 મુજબ ગુન્હો નોંધ્યો છે. તેમજ આ અંગે તપાસના ચક્રો ગતિમાન કર્યા છે. જોકે આપઘાતનો પ્રયાસ કરનાર બંન્ને ભાઈ-બહેન હાલમાં સારવાર હેઠળ છે.