આમ આદમી પાર્ટી સાથે ઠગાઇ કરનાર સામે પાર્ટીએ લગાવ્યો વિશ્વાસઘાતનો આરોપ!

મહેસાણા: આમ આદમી પાર્ટીમાં પ્રદેશ મહામંત્રી તરીકેનું સ્થાન ધરાવતા રાજેશ પટેલે મહેસાણા લોકસભા 4 બેઠક પરથી આમ આદમી પાર્ટીના ઉમેદવાર તરીકે નામાંકન હતું. ત્યાર બાદ રાજેશ પટેલે આમ આદમી પાર્ટી તરફથી કરેલી પોતાની ઉમેદવારી પરત ખેંચી લેતા પાર્ટીના કાર્યકર્તાઓ અને સમર્થકોને ભારે આઘાત લાગ્યો હતો. જેને લઇને પક્ષના કાર્યકર્તાએ ગદ્દારી અને વિશ્વાસઘાત અંગેની ફરીયાદ દાખલ કરી છે.

આપના ઉમેદવારે પોતાની ઉમેદવારી પરત ખેંચી લેતા પાર્ટીના કાર્યકર્તાઓને આઘાત લાગ્યો હતો. જો કે, આ ઘટનાના બે દિવસ બાદ આમ આદમી પાર્ટીના ઉપાધ્યક્ષ ભેમા ચૌધરીએ કાર્યકર્તાઓ અને પક્ષને સાથે રાખી ઉમેદવારી પત્ર પરત ખેંચનાર રાજેશ પટેલ સામે ગદ્દારી અને વિશ્વાસઘાતના ગંભીર આક્ષેપો કરતા મહેસાણા A ડિવિઝન પોલીસ મથકે અરજી આપી ફરિયાદ કરી છે.

ઉલ્લેખનીય છે કે, આમ આદમી પાર્ટીના માત્ર રાજેશ પટેલ જ નહીં પરંતુ ભૂતકાળની અન્ય ચૂંટણીઓમાં પણ પાર્ટીના ઉમેદવાર ચૂંટણીની તારીખ નજીક આવતા ફરી ગયા હોવાની ઘટના બનેલી છે. ત્યારે હવે રાજેશ પટેલ પણ બેચરાજી ખાતેના ભાજપ કાર્યક્રમમાં કેસરિયા કરે તેવી ખબરો પર ગણતરીના સમયમાં જ મહોર લાગી શકે છે.