નાગલપુરમાં ઇલેક્ટ્રોનિક્સના ગોડાઉનમાં લાગી આગ, વેપારીને લાખોનું નુકસાન

નાગલપુર વિસ્તારમાં આવેલ જનપથ હોટલ પાસેના ઇલેક્ટ્રોનિક્સ ચીજવસ્તુ સનગ્રહિત કરેલ ગોડાઉનમાં એકાએક રાત્રીના 3 વાગ્યાના સુમારે આગ લાગી હતી. આ આગ જોત જોતામાં આખા ગોડાઉનમાં પ્રસરી જતા તમામ ચીજવસ્તુઓ બળીને ખાખ થઇ ગઇ હતી.

મહેસાણાઃ શહેરના નાગલપુર વિસ્તારમાં આવેલ જનપથ હોટલ પાસેના ઇલેક્ટ્રોનિક્સ ચીજ વસ્તુ સનગ્રહિત કરેલ ગોડાઉનમાં એકા એક રાત્રીના 3 વાગ્યાના સુમારે આગ લાગવાની ઘટના બનવા પામી હતી. અગમ્ય કારણોસર લાગેલી આગ જોત જોતામાં સમગ્ર ગોડાઉનમાં પ્રસરી જતા ગોડાઉનમાં પડેલો ટીવી ફ્રીઝ, એસી સહિતનો ઇલેક્ટ્રિનિક્સ ચીજ વસ્તુઓનો સામાન ભડભડ બળીને ખાખ થઇ ગયો હતો.

આગ ભીષણ સ્વરૂપ ધારણ કરતા મહેસાણા ફાયર ફાઇટર ટીમને જાણ કરાતા ફાયર ટીમે ઘટના સ્થળે પહોંચી ગોડાઉનમાં લાગેલી આગ બુજાવવા ભારે જહેમત ઉઠાવી હતી. જો કે, આગ બેકાબૂ બની જતા એક કલાક જેટલા સમયની ભારે જહેમત બાદ ફાયર ટીમે આગ પર કાબુ મેળવવામાં સફળતા મેળવી હતી.

તહેવારોના દિવસોમાં વેપારીઓ દ્વારા માલ-સામાન પર સ્કીમ અને ડિસ્કાઉન્ટ વધારે મેળવવા અને વધુ ગ્રાહકોને માલ વેચવા આ પ્રકારના ઇલેક્ટ્રોનિક્સ ઉપકરણોનો ગોડાઉનમાં સંગ્રહ કરાતો હોય છે, પરંતુ નાગલપુરમાં બનેલી આ આગની ઘટનામાં વેપારીને લાખો રૂપિયાનું નુકસાન થયું હતું. જો કે, આગ લાગવા પાછળનું કોઈ ચોક્કસ કારણ હજુ સુધી સામે આવ્યું નથી. જેને જાણવા વધુ તપાસ હાથ ધરવામાં આવી છે.