મહીસાગરમાં કોરોના મહામારીના સમયમાં 652 જેટલા રકતદાતાઓએ રકતદાન કર્યું

કોરોના વાઈરસની વૈશ્વિક મહામારી વચ્ચે પણ જિલ્લાની એનેમીક સગર્ભા મહિલાઓને તેમજ થેલેસેમિયાના દર્દીઓ સાથે કોરોનાના દર્દીઓને નિ:શુલ્ક ધોરણે અવિરત પણે રક્ત મળી રહે અને રક્તના અભાવે નિરોગી થવામાં અવરોધ ઉભો ન થાય તે માટે મહીસાગર જિલ્લામાં આવેલા વિવિધ આરોગ્ય કેન્દ્રો ખાતે રક્તદાન કેમ્પોનું આયોજન કરવામાં આવ્યું હતું.

મહીસાગરઃ કોરોના વાઈરસની વૈશ્વિક મહામારી વચ્ચે પણ જિલ્લાની એનેમીક સગર્ભા મહિલાઓને તેમજ થેલેસેમિયાના દર્દીઓ સાથે કોરોનાના દર્દીઓને નિ:શુલ્ક ધોરણે અવિરત પણે રક્ત મળી રહે અને રક્તના અભાવે નિરોગી થવામાં અવરોધ ઉભો ન થાય તે માટે મહીસાગર જિલ્લામાં આવેલ વિવિધ આરોગ્ય કેન્દ્રો ખાતે રક્તદાન કેમ્પોનું આયોજન કરવામાં આવ્યું હતું.

જિલ્લા કલેકટર આર.બી.બારડ અને જિલ્લા વિકાસ અધિકારી નેહા કુમારીના માર્ગદર્શન હેઠળ જિલ્લા આરોગ્ય અધિકારી ડૉ.એસ.બી.શાહની રાહબરીમાં મહીસાગર જિલ્લામાં મે-2020થી જુલાઇ-2020 દરમ્યાન જિલ્લામાં આવેલ વિવિધ પ્રાથમિક આરોગ્ય કેન્દ્રો અને અર્બન હેલ્થ સેન્ટર તેમજ હેલ્થ એન્ડ વેલનેશ સેન્ટર જેવા કે લુણાવાડા, ખેડાપા, ખાનપુર, સરસણ, ખારોલ, ઓથવાડ, મુનપુર, મલેકપુર-શામણા, ભરતપુર-વિરપુર, હાથીવન, થાણાસાવલી અને જનોડ ખાતે મેડીકલ ઓફીસરો, આયુસ મેડીકલ ઓફીસરો, અને રેડ ક્રોસ સોસાયટી પંચમહાલ-ગોધરાનાં ર્ડોકટર તેમજ આરોગ્ય ટીમો દ્વારા યોજવામાં આવેલા રક્તદાન કેમ્પોમાં જિલ્લાના 652 જેટલા રકતદાતાઓએ પોતાના રક્તનું દાન કરીને કોરોના સામેની લડતમાં અનેરું યોગદાન આપી ઉત્તમ ઉદાહરણ પૂરું પાડ્યું હતું.

આ રક્તદાન કેમ્પોમાં દાતાઓ જ્યારે કેમ્પોના સ્થળે આવ્યા ત્યારે તેમને થર્મલ ગનથી આરોગ્ય તપાસ કરી તેમના હાથ સાફ કરવા માટે હેન્ડવોશ તેમજ સેનિટાઈઝરની વ્યવસ્થા કરવામાં આવી હતી. જ્યારે સિનિયર મેડિકલ ઓફિસરે રક્તદાન કેમ્પમાં કોરોનાને ધ્યાને લઇ સાવચેતીના તમામ પગલા સુનિશ્ચિત કરવાની સાથે રક્તદાતાઓને બેડશીટ બદલવાની અને તમામ સામગ્રી જંતુ રહિત રહે તેનો સુચારુ આયોજન કર્યું હતું.

આ રક્તદાન કેમ્પોમાં 652 યુનિટ બ્લડનું કલેક્શન કરવામાં આવ્યું હતું. રક્તદાનએ શ્રેષ્ઠ મહાદાન છે જે કોરોનાના દર્દી, એનેમિક સગર્ભા બહેનો અને થેલેસેમિયાના દર્દીઓને પણ જરૂર પડે તો આ સંગ્રહ કરેલ રક્તનો પ્રવાહ પહોંચાડી શકાય તે માટે કોરોના મહામારીના સમય વચ્ચે પણ આ રક્તદાન કેમ્પો જન ઉપયોગી બની રહેશે.