કચ્છ જિલ્લામાં આ વર્ષે મેઘરાજાએ મહેર કરતા અનેક વિસ્તારો જેવા કે, તળાવ, ડેમ અને રણ વિસ્તારમાં પાણી ભરાઈ ગયા છે. ત્યારે વાગડના ફતેગઢ મોઆણાના રણમાં પાણી ભરપૂર માત્રામાં છે. ત્યારે આ રણમાં અસંખ્ય પ્રમાણમાં ફલેમિંગો, પેલેકીન, જળ કુકડી, બતક, ઈઝરાયેલ બગલા, અને સાયબરીયન બતક સહિતના દસથી બાર જાતના પક્ષીઓ જોવા મળે છે.
કચ્છમાં શિયાળો ગાળવા માટે આવતા યાયાવર પક્ષીઓનો પડાવ અનેક તળાવમાં જોવા મળે છે. આ વરસે શિરાંનીવાંઢ અને ગાંગટા બેટ, કુડા રણ સહિતના વિસ્તારમાં પાણી ન હોવાથી યાયાવર પક્ષીઓને તળાવ, ડેમ અને કેનાલની આજુબાજુના પાણીમાં પડાવ નાખવો પડયો છે. એક માસ અગાઉ શિરાંનીવાંઢના રણમાં ફલેમિંગો જોવા મળતા હતા.
પરંતુ અત્યારે પાણી ન હોવાથી આ રણ સુમસામ બની ગયું છે. અત્યારે ફતેગઢ પાસે નર્મદા કેનાલની નજીકના પાણીમાં ફલેમિંગો જોવા મળી રહયા છે. બીજી તરફ રવેચી મંદિર નજીકના રવ ગામે આવેલ તળાવમાં યાયાવર કુંજ પક્ષીએ પડાવ નાખ્યો છે. આ પક્ષીના કલરવથી વાતાવરણ આનંદીત બની ગયું છે.
