મસ્કા ગ્રામ પંચાયતની અનોખી પહેલ, ઘરની બહાર દીકરીઓના નામની નેમપ્લેટ લગાવાઇ

કચ્છ જિલ્લાના માંડવી તાલુકાના મસ્કા ગામે બેટી બચાવો બેટી પઢાવો અભિયાન અંતર્ગત નવી પહેલ કરવામાં આવી છે. જેમાં ઘરોની બહાર દિકરીઓના નામની નેમ પ્લેટ રાખવામાં આવી છે.

• માંડવી તાલુકાના મસ્કા ગામમાં હાલે 200 જેટલા ઘરોમાં દીકરીઓના નામની નેમપ્લેટ
• બેટી બચાઓ બેટી પઢાઓ યોજનાના ભાગરૂપે ગામના સરપંચ દ્વારા અનોખી પહેલ
• ઘર કી પહેચાન દીકરીઓ કે નામ

કચ્છ: સામાન્ય રીતે આપણે કોઈ શહેરમાં કે ગામમાં જઈએ તો મોટાભાગે ઘરના મોભીના નામથી લોકોને સરનામું પૂછતાં હોઈએ. આ ભાઈનું ઘર ક્યાં છે પણ કચ્છમાં આ રૂઢિગત પ્રણાલી બદલાઇ છે. કચ્છનાં ગામોમાં બેટી બચાવો અને બેટી પઢાવો અભિયાનને પ્રોત્સાહિત કરવા માટે ગ્રામ પંચાયત દ્વારા અનોખી પહેલ કરાઈ છે. જેમાં ઘરની નેમ પ્લેટ પિતા, દાદા કે ભાઈના નામ પર નહિ પરંતુ ઘરની દીકરીના નામ પર રાખવામાં આવે છે. ઘરમાં દીકરી હોય અને તે અભ્યાસ કરતી હોય તો તેના નામની તકતી ઘરની બહાર લગાવવામાં આવે છે.

અન્ય ગામોમાં પણ શરૂ કરાઇ પહેલ

હાલમાં માંડવી તાલુકાના મસ્કા ગામમાં આ પહેલ શરૂ કરવામાં આવી છે. દીકરીઓને આગળ લાવવા માટેનો આ પ્રયાસ ખરેખર બિરદાવવા લાયક કહી શકાય તેમ છે. ઘર કી પહેચાન બેટીઓ કે નામ અંતર્ગત કચ્છના મોટા અંગીયા, નિરોણા, મસ્કા, કુકમા, કુનરિયા અને સિનુગ્રા સહિતના ગામોમાં પણ આ પહેલ શરૂ કરાઇ છે.

દીકરીઓના નામની નેમપ્લેટ

મસ્કામાં હાલે 200 જેટલા ઘરોના નામ દીકરીના નામથી

મસ્કા ગામમાં કોઈ ઘરની પૂછા કરતા મસ્કા ગામના એક ઉમરલાયક ભાઇ બોલ્યા કે, જે ઘરને વનનો આય ? ! (કોના ઘરે જવું છે) અમે કહ્યું ,રિદ્ધિ સચદે અને ભાઇએ આંખોમાં ચમક ભરી ઈશારો કર્યો અને એક ઘરનો દરવાજો અમને આવકારતો હતો. ઘરના મોટા દરવાજા પર નેમ પ્લેટ પર લખેલું હતું. રિદ્ધિ સચદે, બેટી બચાવો બેટી ભણાવો. મસ્કા ગામમાં ઘર કી પહેચાન બેટીઓ કે નામ. જોઇને મન હરખાઇ જાય. આપણે કોઇના ઘરનું સરનામું પૂછીએ તો એમ બોલતા હોઇએ છીએ કે આ ભાઈ કે પેલા ભાઇનું ઘર કયાં આવ્યું અથવા એમના વ્યવસાયને લઈને ભાઇનું નામ પૂછી ઘર શોધીએ મોટા ભાગે બધે એવું જ હોય છે પણ હવે સમાજની તાસીર બદલાઇ રહી છે. માંડવી તાલુકાના મસ્કામાં હાલે 200 જેટલા ઘરોના નામ દિકરીઓના નામ પર પરિવારે સહર્ષ સ્વીકાર્યા છે.

દીકરીઓના નામની નેમપ્લેટ

ગામમાં દીકરીઓને સ્વરક્ષણ માટેની પણ તાલીમ અપાય છે

માંડવી તાલુકાનું મસ્કા ગામ સરપંચ કીર્તિભાઈ ગોરના નેતૃત્વમાં સતત આગળ વધી રહ્યું છે, ત્યારે મસ્કા ગામમાં ઘરની ઓળખ દિકરીના નામ પર કરવામાં આવી છે. માંડવી તાલુકાના મસ્કા ગામમાં જેમ જેમ જાગૃત નાગરિકો આ વિશે માહિતગાર થાય છે તેમ તેઓ પણ વ્હાલી દિકરી સાર્થક કરતાં પોતાના ઘરને દીકરીનું નામ આપવા ઉમળકો બતાવે છે. આ ઉપરાંત મસ્કા ગામમાં દીકરીઓ માટે કરાટે, લાઠીદાવ સ્વરક્ષણ માટે શિખડવામાં પણ આવી રહ્યું છે.

દીકરીઓના નામની નેમપ્લેટ

આ પણ વાંચો :ડીસા ખાતે ગુજરાત પોષણ અભિયાન અંતર્ગત 'બેટી બચાવો બેટી પઢાઓ' કાર્યક્રમ યોજાયો

ઘર કી પહેચાન બેટીઓ કે નામને મસ્કામાં ભારે પ્રતિસાદ

માંડવી તાલુકાનું મસ્કા અને ભુજ તાલુકાના કુકમા અને ખાવડાનો ડુમાળો વિસ્તાર તેમજ અંજાર તાલુકાના સિનુગ્રાના લોકોએ આ પ્રત્યે ઉત્સાહ બતાવ્યો છે. ઘર કી પહેચાન બેટીઓ કે નામને મસ્કામાં ભારે પ્રતિસાદ મળી રહ્યો છે. રાજય સરકારની મહિલા અને બાળ વિકાસ વિભાગ દ્વારા બેટી બચાવો બેટી પઢાઓ યોજનાના અભિયાન ભાગરૂપે થઇ રહેલા આ કાર્યમાં કચ્છના લોકો ઉત્સાહ દેખાડી રહ્યા છે. Etv Bharat સાથે વાતચીત કરતા મસ્કા ગામની દીકરી રિદ્ધિ સચદેએ જણાવ્યું હતું કે, આ અનોખી પહેલ અંતર્ગત જે કોઈ વિસ્તારમાં ઉચ્ચ અભ્યાસ કરતી દીકરી રહેતી હશે એ વિસ્તારના ચોકનું નામ પણ એ દીકરીના નામ પરથી રાખવામાં આવશે.

દીકરીઓના નામની નેમપ્લેટ

આ પણ વાંચો :ભુજમાં બેટી બચાવો બેટી પઢાઓ જાગૃતિ રેલી યોજાઇ

ગુજરાત સરકારના બેટી બચાવો બેટી પઢાઓ અંતર્ગત આ પહેલ કરવામાં આવી

મસ્કા ગામના સરપંચ કીર્તિ ગોરે ETV Bharat સાથે વાત કરતા જણાવ્યું હતું કે, દીકરીઓને પ્રોત્સાહન મળે એ માટે ગુજરાત સરકારના બેટી બચાવો બેટી પઢાઓ અંતર્ગત આ પહેલ કરવામાં આવી છે. મસ્કા ગામમાં 200 જેટલા ઘર દીકરીઓના નામે ઓળખાય છે.

દીકરીઓના નામની નેમપ્લેટ