કચ્છ બોર્ડર રેન્જના પૂર્વ કચ્છ, પાલનપુર સહિતમાં એટીએમ ચોરીની ઘટનાઓને પગલે રેન્જ આઈજી ડી.બી.વાઘેલાએ ચોરીના બનાવનો ભેદ ઉકેલવા પાલનપુર અને પૂર્વ કચ્છ પોલીસને અલગ અલગ ટીમ બનાવી ગમે તે ભોગે આરોપીઓને દબોચી લેવા સૂચના આપી હતી. આ કરતૂત હરિયાણાની ગેંગના જ હોવાની પોલીસને પાકી બાતમી હતી, પરંતુ આરોપીઓ અંગે કોઈ કડી મળતી નહોતી. દરમિયાન, ગાંધીધામ બી ડિવિઝન પીઆઈ જે.પી.જાડેજાને ગાંધીધામ-પાલનપુરના ATM તોડનારી ગેંગનો લિડર હાસમ હાલ રાજસ્થાનના જોધપુર જિલ્લાના ફલોદી તાલુકાના મલાર ગામે રહેતો હોવાની બાતમી મળી હતી. બાતમીના આધારે પૂર્વ કચ્છ પોલીસની એક ટીમને મલાર મોકલી હાસમને ઝડપી લેવા ઓપરેશન હાથ ધર્યું હતું અને તેને સફળતાથી ઝડપી ગાંધીધામ લવાયો છે.
રાજયના વિવિધ જિલ્લામાં એટીએમ તોડીને ચોરી કરતી ગેંગનો સુત્રદાર પકડાયો આરોપીની પુછપરછમાં જણાવ્યું કે તારીખ 10 જૂલાઈ 2017ના રોજ ભરૂચમાં HDFC બેન્કનું ATM તથા સુરતના ઉધના અને સચિન વિસ્તારમાં ATM પણ તોડ્યા હતા, જ્યારે વડોદરામાં 3 અલગ અલગ સ્થળે ATM તોડેલાં છે. જે પૈકી એક ATM તોડતી વખતે પોલીસ-પબ્લિક આવી જતાં તે નાસી ગયા હતા, જ્યારે ગોધરામાં એક ATM , અમદાવાદના સરદારનગરમાં એક ATM , રાજકોટમાં એક્સિસ બેન્કના ATMમાથી 11 લાખ અને અંજારના વરસાણા નજીક ATM તોડવા પ્રયાસ કરેલો અને તે પહેલા છ દિવસ અગાઉ પાલનપુરમાં ATM તોડીને ચોરી કરી હોવાનું ખુલ્યું છે.પૂર્વ કચ્છ પોલીસ વડા પરીક્ષિતા રાઠોડે આ સફળતા બાદ પત્રકારો સાથે વાત કરતા જણાવ્યું કે, હરિયાણાના મેવાત જિલ્લામાં ATM તોડીને ચોરી કરતી નાની-મોટી 50 ગેંગ કાર્યરત છે. પોલીસે પકડેલાં 46 વર્ષિય હાસમદીન અલ્લાબચાયેં ખાને પ્રાથમિક પૂછપરછમાં તેની ગેંગની મોડસ ઓપરેન્ડી અંગે ચોંકાવનારી કબૂલાત આપી હતી. હાસમે જણાવ્યું કે છેલ્લાં 10 વર્ષથી તે ગેંગલિડર તરીકે કાર્યરત છે. તેની ગેંગમાં 10 આરોપીઓ સામેલ છે. આરોપીઓ ગુગલ મેપ્સ એપ્લિકેશનના આધારે હાઈવે પર આવતા શહેરોના ATMની માહિતી મેળવી લેતાં. ત્યારબાદ સૌ પોત-પોતાના મોબાઈલ ફોન સ્વિચઓફ્ફ કરી એકસાથે નીકળી પડતાં. ATMમાં પ્રવેશે ત્યારે મોઢા પર બુકાની અને હાથમાં મોજા પહેરી લેતાં. જેથી તેમના ચહેરા કે ફિંગર પ્રિન્ટ ટ્રેસ ના થઈ શકે. ગેસકટર વડે ATMની જમણી બાજુની ચેસ્ટ કાપીને અંદર રહેલી કૅશ કાઢી લઈ મહિન્દ્રા પીકઅપ વાનમાં નાસી છૂટતાં. જે પીકઅપ વાનમાં નાસી છૂટ્યાં હોય તે વાન હરિયાણા પાસિંગની ટ્રકમાં લાવતા. ગુનો આચરી પાંચ-દસ કિલોમીટર દૂર જઈ પીકઅપ ફરી ટ્રકમાં ચઢાવી દેવાતી. જેથી ચોરીમાં વપરાયેલું વાહન પણ ટોલનાકાના કોઈ CCTVમાં નજરે ના ચઢતું. મોબાઈલ લોકેશન અને ટોલનાકાના CCTVના આધારે તપાસ કરતી પોલીસને ક્યારેય કોઈ કડી જ ના મળતી. ટેકનિકલ સર્વેલન્સ પર આધાર રાખતી થઈ ગયેલી પોલીસને આ સફળતા હ્યુમન ઈન્ટેલિજન્સ (ખબરી)ના આધારે મળી છે. ધારો કે પોલીસને ગેંગની માહિતી મળી જાય તો પણ તેમને પકડવા ખૂબ અઘરું મનાય છે. કારણ કે, પોલીસ પકડવા આવે તો આરોપીઓ પોલીસ પર પણ હુમલો કરતાં અચકાતાં નથી. આમ, પૂર્વ કચ્છ પોલીસને આ એક મોટી સફળતા મળી છે. ગેંગના અન્ય આરોપીઓને પકડવા હાલ પોલીસની અન્ય ટીમો રાજસ્થાનમાં કાર્યરત છે.
