ભુજના ધારાસભ્ય ડૉ.નિમાબેન આચાર્ય સાથે ETV BHARATની ખાસ વાતચીત

કચ્છમાં જ્યારે-જ્યારે પણ આફત આવી છે, ત્યારે કચ્છના તંત્ર અને કચ્છી માડુંઓએ સાથે મળીને આફતને અવસરમાં પલટાવી છે. કોરોના જેવી વૈશ્વિક મહામારી વચ્ચે પણ કચ્છનું તંત્ર અને કચ્છી પ્રજા સંકલન અને સાવચેતી સાથે યુદ્ધમાં જોડાયેલું છે. આગામી દિવસોમાં આ જ રીતે સૌ કોઈએ સાથે મળીને આ લડાઈમાં જીતવા માટે જાગૃત રહેવું પડશે તેવો અનુરોધ ભુજના ધારાસભ્ય ડૉ. નિમાબેન આચાર્યએ TEV BHARAT સાથેની ખાસ વાતચીતમાં કર્યો હતો.

ભુજ : ધારાસભ્ય નીમાબેન આચાર્યના લોકસંપર્ક કાર્યાલય ખાતે સખી મંડળની બહેનો દ્વારા કચ્છી કાપડ બાંધણીનો ઉપયોગ કરીને ડિઝાઇનર માસ્ક બનાવવાની કામગીરીને લઇ ETV BHARAT સાથે વાતચીત કરતા ધારાસભ્યએ જણાવ્યું હતું કે, ભુજ જિલ્લાનું પાટનગર છે તેથી તેની જવાબદારી સૌથી વધુ છે. જિલ્લાનું વહીવટી તંત્ર-પોલીસ તંત્ર આરોગ્ય તંત્ર ખૂબ જ કઠિન પરિશ્રમ સાથે કાર્ય કરી રહ્યું છે.

આ તકે તેઓએ વધુમાં જણાવ્યું હતું કે, વિવિધ ગામોના સંરપંચોની જાગૃતિ અને લોકોની સહિયારા કામ કરવાની પદ્ધતિને પગલે ગામો-ગામ અને શહેરોમાં લોકો જાગૃત છે. જેથી આસપાસ બહારથી આવતા લોકોની જાણકારી પણ તંત્રને તત્કાલ મળી રહી છે. બહારથી આવતા આપણા જ કચ્છી લોકોનો અનુરોધ છે કે, તેઓ આરોગ્ય તંત્રની ચોક્કસ માર્ગદર્શિકાનો ચુસ્તપણે અમલ કરે અને કચ્છને safe zoneમાં રાખવાની પોતાની આ જવાબદારી પણ નિભાવે.સમગ્ર દેશમાં લોકડાઉનને પગલે વેપાર-ધંધા જ્યારે અટવાયેલા છે, ત્યારે ભુજમાં રાજ્ય સરકારની વિવિધ યોજનાઓથી સિલાઈના સંચા અને મહિલાઓને તાલીમ બાદ આ સમયે મહિલાઓ વિવિધ માસ્ક તૈયાર કરીને રોજગારી પણ મેળવી રહી છે. આજે મહામારી વચ્ચે માસ્ક પહેરવું અનિવાર્ય છે. ત્યારે લોકોને માસ્ક પણ મળતા થઈ રહ્યા છે અને મહિલાઓને રોજગારી પણ મળતી થઇ છે. આ માસ્કનું વિતરણ દવાની દુકાનોમાં કરવામાં આવી રહ્યું છે. દવા ખરીદનાર દરેક વ્યક્તિને બે માસ્ક આપવામાં આવ્યા છે. જે ભુજ શહેર અને મત વિસ્તાર માટે એક લાખમાં તૈયાર કરવામાં આવી રહ્યા છે. ચોક્કસથી આ દુઃખનો સમય પણ આપણે પસાર કરી લઈ અને આફતને અવસરમાં પલટાવી કચ્છને સેફઝોનમાં ધ્યાનમાં રાખી શકીશું તેવો વિશ્વાસ ધારાસભ્યએ વ્યક્ત કર્યો હતો.