રેલડી ફાર્મના વાડી માલિક અને લોકગાયિકા ગીતા રબારી સામે ગુનો નોંધાયો

ભુજ તાલુકાના રેલડી ગામના ફાર્મમાં ધાર્મિક પ્રસંગે યોજાયેલો ગીતા રબારીનો ડાયરો ચર્ચાસ્પદ બન્યો હતો, જે બાબતે વાડીના માલિક સંજય ઠક્કર અને જાણીતા લોકગાયિકા ગીતા રબારી સામે જાહેરનામા અને વર્તમાન કોરોના મહામારીના કાળમાં નિયમોના ભંગ બદલ પોલીસ સ્ટેશને ગુનો દાખલ કરવામાં આવ્યો હતો.

• ફાર્મના માલિક અને લોકગાયિકા સામે ગુનો નોંધાયો
• ડાયરાના કાર્યક્રમમાં જાહેરનામા અને કોરોનાનાં નિયમોનો ભંગ
• વિવિધ કલમો હેઠળ ગુનો નોંધવામાં આવ્યો

કચ્છ: બે દિવસ પહેલાં વિંઝાણના મામોટિયા પરિવારની પેડીના ધાર્મિક પ્રસંગે રાજ્યના જાણીતા કલાકારોનો ડાયરો યોજાયો હતો. જેમા કોરોના ગાઈડ લાઈનનો ભંગ કરવામાં આવ્યો હતો. જે બાબતે બુધવારે રાતે પધ્ધર પોલીસ વતી સહાયક ફોજદાર મુકેશભાઈ ડાંગીએ ભાવેશ લકકી એગ્રો ફાર્મના માલિક સંજય ઠક્કર અને લોકગાયિકા ગીતા રબારી સામે ગુનો દાખલ કરાવ્યો હતો.

સામાજીક અંતર ના જળવાયું

વાડીના માલિક સંજય ઠક્કર દ્વારા કોઈ મંજૂરી લીધા વગર ડાયરાનું આયોજન કર્યું હતું. ગીતા રબારીએ જાહેરનામું હોવા છતાં ડાયરાની રમઝટ બોલાવી હતી આ ઉપરાંત ડાયરાના કાર્યક્રમમાં સામાજિક અંતર પણ નહોતું જળવાયુ અને કાર્યક્રમમાં ઉપસ્થિત લોકોએ માસ્ક પણ નહોતા પહેર્યા જેનો ઉલ્લેખ પણ ફરિયાદમાં કરવામાં આવ્યો છે.

જુદી જુદી કલમો તળે ગુનો નોંધવામાં આવ્યો

આ ગુનામાં કલમ 188, 269 , 270 તથા ગુજરાત પોલીસ ધારાની કલમ 139 અને ડિઝાસ્ટર મેનેજમેન્ટ ધારાની કલમ 51 બી તેમજ એપેડેમીક ધારાની કલમ 3 હેઠળ ગુનો નોંધવામાં આવ્યો હતો.

આ પણ વાંચો :કચ્છમાં રાજ્યના નામી કલાકારોએ બોલાવીએ ડાયરાની રમઝટ, કોરોના ગાઈડલાઈન મુકી નેવે

કાયદેસરની કાર્યવાહી હાથ ધરવામાં આવી

લોકગાયિકા ગીતા રબારી કોરોના કાળ દરમિયાન અવારનવાર વિવાદમાં આવ્યા હતા. તાજેતરમાં જ ઘરે રસી લેવાનો અને તે પહેલા વડઝર ગામના ડાયરાના પ્રકરણો પણ ભારે ચર્ચાસ્પદ બન્યા હતા. પરંતુ આ અગાઉ કોઇ કેસમાં તેમની સામે કોઇ કાર્યવાહી થઇ ન હતી હવે પ્રથમ વખત તેમની સામે કાયદાકીય કાર્યવાહી હાથ ધરવામાં આવી છે.

આ પણ વાંચો : માણાવદમાં યોજાયેલા લોક ડાયરામાં કોવિડ ગાઈડલાઈનનો ભંગ, સાંસદ રમેશ ધડુક રહ્યા હતા હાજર