ડાકોરઃ શહેરમાં નવનિર્મિત શાકમાર્કેટમાં વલ્લભ નિવાસની માલિકીની જગ્યામાં ગેરકાયદેસર બાંધકામ કરી દુકાનોનું નિર્માણ કરવામાં આવ્યું છે. જે અંગે કલેકટર સહિત ઉચ્ચ કક્ષાએ અનેક વખત રજૂઆતો કરવામાં આવી હતી. ત્યારે હવે ગેરકાયદેસર બાંધકામ દૂર કરવા સાંસદને પણ આવેદનપત્ર આપી રજૂઆત કરવામાં આવી છે.
ડાકોરમાં નવનિર્મિત શાકમાર્કેટમાં ગેરકાયદેસર બાંધકામ દૂર કરવા સ્થાનિકોની માંગ ડાકોરના શહીદ પોળ વિસ્તારને નજીક આવેલા વલ્લભ નિવાસ ધર્મશાળાના સર્વે નંબર 1493માં ચેરિટી કમિશનરની મંજૂરી વગર ડાકોર નગરપાલિકામાં શોપિંગ સેન્ટર બાંધવાની મંજુરી માટે અરજી કરી હતી. જે સંદર્ભે નગરપાલિકાના તત્કાલીન પ્રમુખ તથા ચીફ ઓફિસર દ્વારા કાગળોની કોઈ જ ખરાઈ કર્યા વગર મંજૂરી ગેરકાયદેસર રીતે આપેલ છે. જેની સામે વિરોધ થતાં ડાકોર નગરપાલિકા દ્વારા આ વિવાદિત બાંધકામ સંદર્ભે બાંધકામ ફી નહોતી લીધી અને વિવાદ આટોપવા સઘન પ્રયત્નો કરવામાં આવ્યાં હતા. આ વિવાદિત બાંધકામ કરનાર ઈસમના સંબંધી નગરપાલિકા સદસ્ય હોવાથી તેઓના દબાણમાં નિયત તારીખ વિત્યા બાદ અને બાંધકામ પૂર્ણ થયા બાદ બાંધકામની ફી વસૂલી મિલકત નંબર પાડવામાં આવેલ છે. તે સામે જાગૃત નાગરિક દ્વારા આરટીઆઈથી માહિતી માંગતા ઉપરોક્ત ભ્રષ્ટાચાર ઉજાગર થયેલ છે. આ સાથે જ ગેરકાયદેસર બાંધકામ દૂર કરી કાર્યવાહી કરવા માંગ કરવામાં આવી રહી છે.
