ખેડામાં આત્મહત્યાની 2 ઘટનામાં 2ના મોત, 2 ગંભીર

ખેડા જિલ્લામાં શનિવારે આત્મહત્યાની 2 ઘટનાઓથી જિલ્લામાં ચકચાર મચી હતી. જેમાં રાસ્કા ગામના પ્રેમી પંખીડાના મોત નિપજ્યા હતા. જ્યારે, બીજી ઘટનામાં બાળક સહિત 2 વ્યક્તિઓની હાલત ગંભીર બનતા સારવાર હેઠળ ખસેડાયા હતા.

• જિલ્લામાં 5 લોકોએ આત્મહત્યાનો કર્યો પ્રયાસ
• મહેમદાવાદના રાસ્કામાં પ્રેમીપંખીડાનું મોત
• ડાકોરમાં માતા અને પુત્ર સારવાર હેઠળ, પુત્રીનો બચાવ

ખેડા: જિલ્લાના ડાકોર તેમજ મહેમદાવાદ તાલુકાના રાસ્કા ગામે આત્મહત્યા કરવાની 2 ઘટનાઓ બની હતી. જેમાં ડાકોરના 36 વર્ષિય મનિષા પરમારને કોઈક કારણોસર પરિવારમાં બોલાચાલી થઇ હતી. આથી, મનીષાબેનને લાગી આવતા પોતાના 11 વર્ષના પુત્ર તથા પુત્રી સાથે મળી ઝેરી દવા પી આત્મહત્યા કરવાનો પ્રયાસ કર્યો હતો. જેમાં પુત્રીને આપેલી દવા પુત્રીએ ફેંકી દેતા તેનો આબાદ બચાવ થયો હતો. જ્યારે, મનિષાબેન અને તેમના પુત્રએ ઝેરી દવા ગટગટાવી લીધી હતી. પરિવારને જાણ થતા તેઓને તાત્કાલિક સારવાર અર્થે ડાકોરની ખાનગી હોસ્પિટલ ખાતે ખસેડવામાં આવ્યા હતા. જ્યાં હાલ બન્ને સારવાર હેઠળ છે. આ મામલે ડાકોર પોલીસે ફરિયાદ નોંધી તપાસ હાથ ધરી છે.

આ પણ વાંચો:Bogus Doctor - ખેડાના કાલસરથી બોગસ ડૉક્ટર ઝડપાયો

મહેમદાવાદના રાસ્કામાં પ્રેમીપંખીડાનું મોત

મહેમદાવાદ તાલુકાના રાસ્કા ગામમાં 2 પ્રેમી પંખીડાએ આત્મહત્યા કરી હોવાની ઘટના બની હતી. રાસ્કા ગામના સીમ વિસ્તારમાં રાત્રીના સમયે ઝાડ પર દુપટ્ટા વડે ગળે ફાંસો ખાઈ ઝાડ પર લટકી ગયા હતા. સ્થાનિક લોકોએ સવારે જોતા મહેમદાવાદ પોલીસને જાણ કરતા પોલીસ ઘટના સ્થળ પર પહોંચી હતી. બન્નેના મૃતદેહને નીચે ઉતારીને મહેમદાવાદ સરકારી હોસ્પિટલમાં પોસ્ટમોર્ટમ માટે મોકલી પોલિસ દ્વારા વધુ તપાસ હાથ ધરાઈ છે.

ખેડામાં આત્મહત્યાની 2 ઘટના

આ પણ વાંચો:ખેડામાં પાર્ક કરેલી ઈકો કારની ઉઠાંતરી, CCTVના આધારે પોલીસે હાથ ધરી તપાસ