જૂનાગઢ : શહેર પોલીસને મળેલી પૂર્વ બાતમીને આધારે શહેરની ખામ ધ્રોલ ચોકડી પાસે બે શંકાસ્પદ યુવાનો મોટરસાઈકલ પર કોઈ ગુનાને અંજામ આપવા જઈ રહ્યા છે તેવી બાતમી પોલીસને મળી હતી. જેને ધ્યાનમાં લઇને પોલીસ દ્વારા આ વિસ્તારમાં વોચ ગોઠવવામાં આવી હતી. જેમાં શંકાસ્પદ બે યુવાનને પકડી પાડીને તપાસ કરતાં તેમની પાસેથી હાથ બનાવટની એક પિસ્તોલ અને રિવોલ્વર સાથે જીવતા 41 કારતુસ મળી આવ્યા હતા. જેનો કબજો કરીને પોલીસે વધુ તપાસ હાથ ધરી છે.
જૂનાગઢ પોલીસને મળી મોટી સફળતા, બે હથિયાર અને 41 જીવતા કારતુસ સાથે આરોપીની ધરપકડ
સમગ્ર મામલાની ગંભીરતાને ધ્યાને લઇને પોલીસ દ્વારા ઊંડાણપૂર્વક તપાસ કરતા સમગ્ર મામલો હથિયારની લે વેચ સાથે જોડાતો જોવા મળતાં પોલીસ દ્વારા પકડાયેલા આરોપીઓની વધુ આકરી તપાસ અને પૂછપરછ કરતાં સમગ્ર મામલે વધુ કેટલાંક ખુલાસાઓ થયા છે. જેને લઇને પોલીસ પણ ચોંકી ગઈ હતી. આ આરોપીઓ પાસેથી જે વિગતો મળી છે, જેના પરથી આ કોઈ આંતરરાજ્ય ગેરકાયદે હથિયાર લે-વેચનું કોઈ મોટું નેટવર્ક ચાલતુ હોય તેવી શંકાને આધારે પોલીસ દ્વારા રાજ્યના અન્ય જિલ્લાઓ અને રાજ્ય બહાર પણ તપાસ કરે તેવી શક્યતાઓ હાલના તબક્કે નકારી શકાય તેમ નથી.
બે હથિયાર અને 41 જીવતા કારતુસ સાથે આરોપીની ધરપકડ છેલ્લાં કેટલાંક દિવસોની અંદર જૂનાગઢ શહેર અને જિલ્લામાંથી 10 કરતાં વધુ ગેરકાયદે હથિયાર પકડી પાડવામાં પોલીસને સફળતા મળી છે. ત્યારે વધુ બે હથિયારની સાથે 41 જેટલા જીવતા કારતુસ મળી આવ્યા છે. જેને લઇને જૂનાગઢ પોલીસ પણ ચોંકી ગઇ છે. તેમજ સમગ્ર મામલે ગેરકાયદેસર હથિયાર વહેંચતી કોઈ ગેંગ જૂનાગઢમાં કામ કરતી હોય તેવી પ્રબળ શંકાને આધારે પોલીસ દ્વારા વધુ તપાસ હાથ ધરવામાં આવી છે. જેમાં વધુ કેટલાંક આરોપીઓને આગામી દિવસોમાં પોલીસ દ્વારા પકડવામાં આવે તેવી પૂરી શક્યતાઓ જોવાઈ રહી છે.
