આગામી શિવરાત્રીનાં મેળાને લઇ ભવનાથ તળેટીમાં સંન્યાસીઓનું આગમન

આગામી મહાશિવરાત્રીના મેળાને લઈ જૂનાગઢની ભવનાથ તળેટીમાં હિમાલય પ્રદેશ તરફથી નાગા સંન્યાસીઓનું આગમન થઈ રહ્યું છે. આગામી દિવસોમાં ભવનાથ તળેટી સંન્યાસીઓ અને તેમના ધુણાઓથી ધમધમતી બનતી જોવા મળશે.

જૂનાગઢ: આગામી થોડા દિવસો બાદ જૂનાગઢની ભવનાથ તળેટીમાં મહાશિવરાત્રી મેળાનું આયોજન થવા જઈ રહ્યું છે. આગામી ૧૮મી ફેબ્રુઆરીથી શિવરાત્રીનો મેળો યોજાશે. જેને લઇ હિમાલય પ્રદેશ અને ઉત્તરાખંડ વિસ્તારમાંથી સંન્યાસીઓનું ભવનાથ તળેટીમાં આગમનને થઈ રહ્યું છે. જેના પગલે ભવનાથ તળેટી સંન્યાસીઓ અને તેમના ધુણાથી આગામી દિવસોમાં ધમધમતી જોવા મળશે. આદિ-અનાદિ કાળથી ભવનાથ તળેટીમાં મહાશિવરાત્રી મેળાનું આયોજન થતું આવ્યું છે. આ મેળામાં શિવના સૈનિક સંન્યાસીઓનું ખાસ મહત્વ છે. જેને લઇ સમગ્ર ભારત વર્ષમાંથી સંન્યાસીઓ ભવનાથ તળેટી તરફ આવીને આઠ દિવસ સુધી ધૂણો ધખાવી ભગવાન શિવની આરાધના પણ કરશે.

આ વર્ષે 10 દિવસ પહેલા ભવનાથ તળેટીમાં સંન્યાસીઓનુ આગમન થઈ રહ્યું છે. ગત વર્ષે મીની કુંભ મેળાની જાહેરાત કરવામાં આવી હતી, ત્યારે પણ આટલા વહેલા સંન્યાસીઓનું આગમન થયું ન હતું. વાત ગત વર્ષના મિની કુંભની કરીવામાં આવે તો જે પ્રકારે સરકાર અને યાત્રાધામ વિકાસ બોર્ડ દ્વારા જાહેરાતો કરવામાં આવી હતી તે પ્રકારની સુવિધાઓ સંન્યાસીઓને મળી ન હતી તેવો આક્ષેપ પણ આ વખતે ભવનાથમાં આવેલા સંન્યાસીઓ કરી રહ્યા છે. મેળાનુ આયોજન માત્ર કેટલાક લોકોના ખિસ્સા ભરવા માટેનો મેળો બનાવ્યો હોય તેવો સનસનીખેજ આક્ષેપ પણ સંન્યાસીઓએ કર્યો છે.