જૂનાગઢમાં શિક્ષકો અને વિદ્યાર્થીઓ સોશિયલ મીડિયાથી કરી રહ્યાં છે નીટની પરીક્ષાની તૈયારી

કોરોના વાઈરસને લઈને ભારત સરકાર દ્વારા લેવામાં આવતી નીટની પરીક્ષા માટે વિદ્યાર્થીઓ ઓનલાઇન અભ્યાસ કરી રહ્યાં છે. કોરોના વાઈરસના ખતરાને ધ્યાને રાખીને આગામી 29 તારીખ સુધી તમામ શૈક્ષણિક સંસ્થાઓ બંધ રાખવાનો નિર્ણય કર્યો છે. ત્યારે વિદ્યાર્થીઓનું શિક્ષણ ન બગડે અને કારકિર્દી લક્ષી નીટની પરીક્ષાઓમાં વિદ્યાર્થીઓ સારા માર્ક સાથે ઉત્તીર્ણ થાય તેને લઈને સોશિયલ મીડિયા મારફત પરીક્ષાની તૈયારીઓ કરી રહ્યાં છે.

જૂનાગઢ: કોરોના વાઈરસ ધીરે-ધીરે વિસ્તરી રહ્યો છે. આ વાઈરસના પોઝિટિવ કેસો સમગ્ર દેશમાં વધી રહ્યાં છે. જેને ધ્યાને રાખીને ગુજરાત સરકાર દ્વારા આગામી 29 માર્ચ સુધી તમામ પ્રકારની શૈક્ષણિક સંસ્થાઓને બંધ રાખવાનો આદેશ કર્યો છે. જેને પગલે વિદ્યાર્થીઓનો શિક્ષણકાર્ય ખોરંભે પડયું હતું. તેમજ આગામી મહિને લેવાના નીટની પરીક્ષાની તૈયારીઓ પર પણ પ્રશ્નાર્થ ઊભું થયું હતું. જેને કારણે વિદ્યાર્થીઓ અને શિક્ષકોમાં પણ ખૂબ જ ચિંતા જોવા મળી હતી. પરંતુ શિક્ષકોનો પ્રયાસ અને વિદ્યાર્થીઓના સહકારથી જૂનાગઢના વિદ્યાર્થીઓ સોશિયલ મીડિયાના માધ્યમથી આગામી 15 દિવસ સુધી કારકિર્દી લક્ષી નીટની પરીક્ષાની તૈયારીઓ કરી રહ્યા છે.અત્યારના સમયને ટેકનોલોજીના સમય તરીકે પણ માનવામાં આવે છે.

જૂનાગઢમાં શિક્ષકો અને વિદ્યાર્થીઓ સોશિયલ મીડિયાના માધ્યમથી નીટ પરીક્ષાની તૈયારીઓ કરી રહ્યા છે

આજનો માનવી આધુનિક સાધનો સાથે ધીરે ધીરે જોડાતો જાય છે. ત્યારે કોરોના વાઈરસના આ ખતરાને પગલે જે પ્રકારે 15 દિવસ સુધી શૈક્ષણિક કામગીરી બંધ રાખવાનો હુકમ થયો હતો. તેની સામે શિક્ષકો હવે સોશિયલ મીડિયાના માધ્યમથી થકી 15 દિવસનો આ સમયગાળો વિદ્યાર્થીઓને વધુ ઉપયોગી અને તેમની ચિંતામાં ઘટાડો કરે તેવા પ્રયાસ સાથે નીટની પરીક્ષાના ઉપયોગી અભ્યાસક્રમો મોબાઇલમાં વીડિયો મારફતે રેકોર્ડિંગ કરીને દરેક વિદ્યાર્થી સુધી વ્યક્તિગત પહોંચી રહ્યાં છે. ખાલી વર્ગખંડમાં માત્ર શિક્ષક ઉપયોગી ચેપ્ટરને વિદ્યાર્થીઓને સામાન્ય સ્થિતિમાં અભ્યાસ કરાવતા હોય તે પ્રકારને અભ્યાસ કરાવતા હોય તેવો વીડિયો મોબાઇલમાં રેકોર્ડિંગ કરી આપે છે.

આ ઘટના વર્ગખંડમાં શિક્ષણ કાર્ય ચાલતું હોય તેવું જ આબેહૂબ લાગે છે. વિડિયો રેકોર્ડિંગ થઇ ગયા બાદ આ વીડિયો શિક્ષક પોતાના સોશિયલ મીડિયા એકાઉન્ટ થકી વ્યક્તિગત દરેક વિદ્યાર્થીઓ સુધી પહોંચે છે, અને નીટની તૈયારીઓનો જે અભ્યાસક્રમ છે. તેને લઈને વિદ્યાર્થીઓની સમસ્યાનો સમાધાન કરતા જોવા મળી રહ્યા છે. આ પ્રકારની વ્યવસ્થા વિદ્યાર્થીઓ પણ ખૂબ જ સ્વીકારી રહ્યાં છે. કોરોના વાયરસથી પોતાનો બચાવ કરીને ઘરમાં બેઠા-બેઠા 15 દિવસ સુધી પોતાની અનુકુળતાએ કારકિર્દી લક્ષી નીટની પરીક્ષાઓની તૈયારીઓ કરી રહ્યા છે.