માંગરોળ શાકભાજી માર્કેટ જર્જરીત હાલતમાં, વેપારીઓ જીવના જોખમે ધંધો કરી રહ્યા છે

માંગરોળ: જૂનાગઢના માંગરોળમાં આવેલી શાક માર્કેટમાં શાકભાજીના નાના વેપારી પરેશાન થઈ રહ્યા છે. તેમને શાક માર્કેટ બહાર બેસવાનો વારો આવ્યો છે. સરકાર ડીજીટલ ઇન્ડિયાની વાતો કરે છે પણ આ વાત અહીં બીલકુલ પોકળ સાબીત થઈ રહી છે. શાક માર્કેટ કે જે રાજાશાહીમાં 1963ના વર્ષમાં બનાવવામાં આવી હતી, ત્યારબાદ આજ દિન સુધી કોઈ પણ પ્રકારનું રિનોવેશન કાર્ય કરવામાં આવ્યું નથી.

આ અંગે વાત કરતા આશુબેનએ જણાવ્યું હતું કે, હાલ શાકભાજીના નાના નાના ગરીબ વેપારીની હાલત દયનીય બની ચુકી છે. ખાસ કરીને જોઈએ તો આ માંગરોળ માર્કેટમાં છત પણ નળીયાવાળી અને તુટેલી હાલતમાં જોવા મળી હતી. જેથી નાના વેપારી પોતાના ઉપર તાડપત્રી લગાવી પોતાનું ગુજરાન ચલાવી રહ્યા છે.ફાતીમા બેને જણાવ્યું કે, નાના વેપારીઓને શૌચાલય કે પાણી જેવી કોઈ પણ પ્રકારની સુવીધા નથી જેથી ધંધો કરતાં પોતાના ઘરે જવું પડે છે.

મહત્વનું છે કે આ માર્કેટની અંદર નાના વેપારીઓ પોતાની શાકભાજી વેચવા આવે છે. કારણ કે અંદર ગમે ત્યારે જર્જરીત હાલતમાં પડેલી છત તૂટી પડવાનો ભય વેપારીઓમાં હોય છે.પરતું તંત્ર આની કોઈ પણ પ્રકારની જવાબદારી નથી લઈ રહ્યું. જેથી નગરપાલીકાને વધારે ભાડું ભરીને પણ બહાર બેસવું પડી રહ્યું છે.

આ માર્કેટમાં 50 વર્ષથી બેસતા એક મહીલાએ કહ્યું કે માત્ર મત મેળવવા રાજકારણીઓ આવે છે અને મત મળ્યા બાદ ગરીબો કયાં ગયા છે, તેની તેમને ખબર પણ નથી હોતી.જો હવે આ માર્કેટનું સમારકામ નહીં થાય તો જરૂરથી આ ધરાશાયી થશે અને અનેક જીંદગીઓને તેનો ભોગ બનવું પડશે.

આ શાક માર્કેટ રાજાશાહીના વખતમાં બનેલી છે અને ત્યાં બેસતા વેપારીઓએ કયારેય પણ તેનું સમારકામ કરતા જોયું નથી. ખાસ તો આ માર્કેટમાં કોઈ પાર્કીંગની પણ વ્યવસ્થા નથી અને નાના વેપારીઓ ભયના માર્યા બહાર બેસવા મજબૂર બની ગયા છે. નગરપાલીકાએ એટલા વર્ષના વેરાની વસુલાત કરીને કરાયું શુ ? તેવા સવાલો પણ ઉઠી રહ્યા છે.