કેશોદના એરપોર્ટ ગ્રાઉન્ડ નજીક આજે દીપડી પાંજરે પૂરવામાં આવી છે. અહીં છેલ્લા કેટલાય સમયમાં ખુલ્લેઆમ ફરી રહેલી દીપડીના કારણે લોકોમાં ડર પ્રસરી ગયો હતો. અહીં દિપડા સહિતના જંગલી પ્રાણીઓ રેવેન્યુ વિસ્તારોમાં આવી ગયા છે.
માંગરોળ અને કેશોદ સહિતના તાલુકાઓના ગામડાઓમાં સીમ વિસ્તારો અને શહેરમાં વારંવાર પ્રાણીઓ દેખાઈ રહ્યાં છે. કેશોદ એરપોર્ટ નજીક દિપડી હોવાની માહિતી જંગલ ખાતાને આપવામાં આવી હતી. કેશોદ એરપોર્ટ નજીક પાંજરૂ ગોઠવી મોડી રાત્રે આ દીપડીને કેદ કરાઈ હતી. જે બાદ એરપોર્ટ કોલોનીમાં રહેતા લોકોએ રાહતનો શ્વાસ લીધો હતો. આ દિપડીને સાસણ એનીમલ કેર સેન્ટર ખાતે મોકલી આપવામાં આવી છે.
