જૂનાગઢ મનપાની ચૂંટણીમાં આજે સાંજે પ્રચાર પડઘમ થશે શાંત

જૂનાગઢઃ મહાનગરપાલિકાની ચૂંટણીના પ્રચારને અંતિમ દિવસે તમામ પક્ષોએ જોર લગાવ્યું છે. આજે પાંચ વાગ્યે પ્રચાર-પ્રસાર પર રોક લાગી જશે.

જૂનાગઢ મનપાની સામાન્ય ચૂંટણીમાં આજે પાંચના ટકોરે પ્રચાર પડઘમ શાંત થઈ જશે. જેને લઈને આજે ભાજપ-કોંગ્રેસ અને પ્રથમ વખત જૂનાગઢ મનપાની ચૂંટણી લડી રહેલી એનસીપીએ તેનો પ્રચાર વેગવંતો બનાવીને તેમના ઉમેદવારોનો વિજય થાય તે માટે પ્રચાર અભિયાન કર્યું છે.

પ્રચારના અંતિમ દિવસે ભાજપ, કોંગ્રેસ અને એનસીપી દ્વારા તેમના ઉમેદવારોની તરફેણમાં પ્રચાર અભિયાન વધુ વેગવંતુ બનાવ્યું હતું. પ્રચારના અંતિમ દિવસે કોઈપણ પ્રકારની ક્ષતિ ન રહે તે માટે પક્ષના પ્રભારીઓ મેદાનમાં આવ્યા છે.

તમામ ઉમેદવારોના વિસ્તારમાં જઈને પ્રચાર અભિયાનને વધુ વેગવંતુ બનાવ્યું હતું. ભાજપની રણનીતિ મુજબ 15 વોર્ડના તમામ મતદારોનો રૂબરૂ સંપર્ક કરીને ભાજપના ઉમેદવારની તરફેણમાં મતદાન કરાવવાનો પ્રયાસ હાથ ધર્યો હતો. એનસીપી દ્વારા જે વિસ્તારમાં ઉમેદવારોની જીત વધુ મજબૂત લાગી રહી છે અથવા તો જે વિસ્તારમાં તેમના ઉમેદવારો ખૂબ સારી ટક્કર આપી રહ્યાં છે, ત્યાં પક્ષે સંપૂર્ણ તાકાતથી મહેનત કરી છે. બીજી તરફ કોંગ્રેસ પણ તેની શાખ બચાવવા માટે ચૂંટણી જંગમાં પ્રચારને મજબૂત બનાવી રહી છે. ઉમેદવારીપત્રો ભરવાના અંતિમ દિવસથી કોંગ્રેસ ભારે અસંતોષનો હતો. જેને પરિણામે કોંગ્રેસને ચૂંટણી પરિણામમાં નુકસાન જાય તેમ જણાઈ રહ્યું છે.