જૂનાગઢ: કોંગ્રેસનું જન વેદના સંમેલન યોજાયું, પરેશ ધાનાણીના સરકાર પર પ્રહાર

જૂનાગઢઃ શહેરમાં વિપક્ષના નેતા પરેશ ધાનાણીની આગેવાનીમાં કોંગ્રેસનું જન વેદના સંમેલન યોજાયું હતું. કોંગ્રેસ કાર્યકર્તાઓએ જિલ્લા કલેક્ટરને આવેદન આપી રાજ્ય સરકાર સામે વિરોધ નોંધાવ્યો હતો.

જૂનાગઢ પ્રદેશ અને જૂનાગઢ જિલ્લા કોંગ્રેસ દ્વારા જન વેદના સંમેલન યોજવામાં આવ્યું હતું. જેના વિધાનસભામાં નેતા પ્રતિપક્ષ પરેશ ધાનાણી હાજરી આપી હતી. જૂનાગઢના ઝાંસીની રાણી ચોકમાં સંમેલન યોજાયા બાદ રેલી સ્વરૂપે કોંગી કાર્યકરોએ જિલ્લા કલેકટરને આવેદનપત્ર આપી અને રાજ્ય સરકાર સામે તેનો વિરોધ વ્યક્ત કર્યો હતો.

પ્રદેશ અને જૂનાગઢ જિલ્લા કોંગ્રેસ સમિતિ દ્વારા આજે ઝાંસીની રાણી ચોકમાં ખેડૂતો, બેરોજગારો, ટ્રાફિકની સમસ્યા, પાક વીમા, ભ્રષ્ટાચાર સહિતના મુદ્દે જન વેદના સંમેલન યોજવામાં આવ્યું હતું. જૂનાગઢ શહેરના ઝાંસીની રાણી ચોકમાં આયોજિત આ સંમેલનમાં પરેશ ધાનાણીએ હાજરી આપી હતી અને રાજ્ય સરકાર ખેડૂતો યુવાનો વિરુદ્ધ હોવાની વાત કરીને સરકાર સામે ભ્રષ્ટાચાર બેરોજગારી સહિતના આક્ષેપો કર્યા હતા.આજના સંમેલનમાં જૂનાગઢના ધારાસભ્ય ભીખા જોશી, માંગરોળના ધારાસભ્ય બાબુ વાજા, વિસાવદરના ધારાસભ્ય હર્ષદ રિબડીયા સહિત મોટી સંખ્યામાં કોંગ્રેસના કાર્યકરોએ હાજરી આપી હતી. સંમેલન પૂર્ણ થયા બાદ નેતા વિપક્ષ પરેશ ધાનાણીની આગેવાનીમાં સંવેદના રેલીનું પણ આયોજન કરવામાં આવ્યું હતું. આ રેલી ઝાંસીની રાણીના પૂતળાથી શરૂ થઈ જિલ્લા કલેકટર કચેરી સુધી પહોંચી હતી. જ્યાં જિલ્લા કલેકટરને ખેડૂતો, બેરોજગારો, ભ્રષ્ટાચાર સહિતના મુદ્દાઓ સંદર્ભે આવેદનપત્ર પાઠવ્યું હતું.