જૂનાગઢ: માળીયા હાટીનાના ગળોદરથી આંત્રોલી સુધીનો ફોરટ્રેક બનાવવાનો નવો સર્વે કરવામાં આવ્યો છે. જેમાં જુથળ, શકરાણા, લંબોરા, ઢેલાણા, ભાટગામ, સુલતાનપુર, ગોરેજ, ચંદવાણા, નગીચાણા, ફરંગટા, બામણવાડા, સહીતના ગામોમાંથી આ ફોરટ્રેક હાઇવે બનાવવાની યોજના ઘડાઇ રહી છે. આ રોડનો સર્વે શરૂ થતાં જ આંદોલનના ભણકારા વાગ્યા છે.
જેમાં સરપંચ એસોસીએશનના પ્રમુખ ભાવેશ ડાભીએ માંગરોળ મુકામે તમામ ગામોના સરપંચોને બોલાવી આ ફોરટ્રેક નહીં બનાવા દેવા વિરોધ કર્યો હતો. જેમાં તમામ સરપંચોના લેટરપેડ ઉપર આ ફોરટ્રેક નહીં બનાવવા લેખિત રજૂઆત કરવામાં આવી હતી. જેમાં મામલતદાર માંગરોળને આવેદન આપીને આ ફોરટ્રેક અહીંથી પસાર નહીં કરવા જણાવાયું હતું.
આ ઉપરાંત વધુમાં જણાવ્યું હતું કે, જો અહીંથી આ ફોરટ્રેક પસાર થશે તો હજારો ખેડૂતોની જમીન સંપાદન થશે તો ખેડુતો નોંધારા બની જશે. જેથી અહીંથી આ રોડ નહીં પસાર કરવા લેખિતમાં જણાવાયું છે. જયારે આ સરપંચ એસોસીએશનને ખેડૂત આગેવાનોએ પણ ટેકો આપ્યો હતો અને આવેદનમાં જોડાયા હતા.