જૂનાગઢમાં ફાયરસેફ્ટીને લઈ ખાનગી ટ્યુશન ક્લાસીસ બંધ હાલતમાં જોવા મળી રહ્યા છે. વેકેશન બાદ શાળાના પ્રથમ દિવસે ટ્યુશન ક્લાસીસ શરૂ ન થતા ખાનગી ટ્યુશન ક્લાસીસના સંચાલકોએ મનપાના નાયબ કમિશ્નરને મળીને ઘટતી કાર્યવાહી તાકીદે પૂરી કરી અને તેમને ટ્યુશન ક્લાસીસ શરૂ કરવાની મંજૂરી આપવામાં આવે તેવી માંગ કરી હતી.
ટ્યુશન ક્લાસીસ સંચાલકોએ કમિશ્નરને કરી રજૂઆત
જૂનાગઢ શહેરમાં છેલ્લા દસ દિવસ કરતા વધુ સમયથી ખાનગી ટ્યુશન ક્લાસીસ બંધ હાલતમાં જોવા મળી રહ્યા છે. સુરતના સરથાણામાં ખાનગી કોચિંગ ક્લાસીસમાં લાગેલી આગના કારણે રાજ્ય સરકાર દ્વારા તમામ કોચિંગ ક્લાસીસમાં ફાયર સેફટીને લઈને કોઈપણ પ્રકારની બેદરકારી નહીં ચલાવી લેવાની વાતને લઇને તમામ ક્લાસીસને બંધ કરી દેવાનો આદેશ કર્યો હતો.
જૂનાગઢ શહેરમાં છેલ્લા દસ દિવસથી 200થી વધુ કોચિંગ ક્લાસીસ બંધ હાલતમાં જોવા મળી રહ્યા છે. વેકેશન બાદ શાળાઓ ફરીથી ખુલી રહી છે અને નવા સત્રનો પ્રારંભ થઇ રહ્યો છે. ત્યારે કોચિંગ ક્લાસીસ બંધ થતા કોચિંગ ક્લાસીસના સંચાલકો પણ ચિંતામાં જોવા મળી રહ્યા છે. જૂનાગઢના કોચિંગ ક્લાસીસના સંચાલકોએ જૂનાગઢ મનપાના નાયબ કમિશ્નરને મળીને સમગ્ર મામલે કોઈ હકારાત્મક નિર્ણય કરવામાં આવે તેમજ ફાયર સેફ્ટીને લઈ જે કઈ પણ પેરામીટર્સ છે તેને પૂરા કરી અને ખાનગી ટ્યુશન ક્લાસીસ અને તાકીદે ફરીથી શરૂ કરવામાં આવે તેવી મંજૂરી આપવાની વાત કરી હતી.
તાજેતરમાં મનપાના કમિશ્નર તરીકે નિમણુક પામેલા તુષાર સુમેરા પણ આજે વહીવટી કારણોસર રજા પર હતા. જેના કારણે નાયબ કમિશ્નર મળીને સમગ્ર ઘટનાને લઇને ઘટતુ કરવાની માંગ કરી હતી. નાયબ કમિશનરે પણ શાળા સંચાલકને માહિતી આપતા જણાવ્યું હતું કે, જે કંઈ પણ વિદ્યાર્થીઓના હિતમાં, ટ્યુશન ક્લાસીસ સંચાલકોના હિતમાં અને જાહેર હિતને ધ્યાને રાખીને આગામી દિવસોમાં યુદ્ધના ધોરણે એન.ઓ.સી અને ફાયર સેફ્ટીની ચકાસણીના મુદ્દાને લઈને કામગીરી હાથ ધરવામાં આવશે અને થોડા દિવસોમાં તમામ કાર્યવાહી પૂર્ણ કરીને ટ્યુશન ક્લાસીસ સંચાલકોને એન.ઓ.સી પ્રમાણપત્ર સુપ્રત કરવામાં આવશે. ત્યાર બાદ ખાનગી ટ્યુશન સંચાલકો તેમના ટ્યુશન ક્લાસીસ રાબેતા મુજબ શરૂ કરી શકશે.
