જૂનાગઢ એગ્રીકલ્ચર યુનિવર્સિટીની ખોરાક અને ઔષધ નિયમન પ્રયોગશાળાને બે વર્ષની મહેનત બાદ ખૂબ મોટી સફળતા મળી હતી. છેલ્લા બે વર્ષથી સરગવાના વિવિધ ભાગો જેવા કે સરગવાનું મૂળ, સરગવાની છાલ, સરગવાનું ફળ, સરગવાના પાન અને સરગવાની સીંગ પર સંશોધન હાથ ધરવામાં આવ્યું હતું. જેમાં સરગવાની સીંગના બાહ્ય આવરણ અને તેના બીજ પર કરવામાં આવેલું સંશોધન સફળ રહેતા એગ્રીકલ્ચર યુનિવર્સિટીને સફળતા મળી છે.
જૂનાગઢ એગ્રીકલ્ચર યુનિવર્સિટીને સરગવાના સંશોધનમાં મળી મોટી સફળતા સરગવાની સીંગ અને તેના બાહ્ય આવરણ પર કરવામાં આવેલું સંશોધન અનેક રોગો સામે અક્સીર સાબિત થયું છે. સરગવાની સીંગ અને તેનું સેવન કરવાથી ઘણા ખરા રોગો શરીરમાં પ્રવેશતા જ નથી તેવું તારણ મળી આવ્યું હતું. સરગવામાંથી મળતું વિટામીન-C લીંબુ કે અન્ય ખાદ્ય પદાર્થમાં જે પ્રમાણે હોય છે તેના કરતાં પાંચથી સાત ગણું વધારે જોવા મળ્યું હતું. સામાન્ય સંજોગોમાં લીંબુ, સંતરા અને મોસંબીને વિટામીન-Cના સોર્સ તરીકે માનવામાં આવે છે. પરંતુ સરગવામાં લીંબુ, મોસંબી અને સંતરા કરતા પણ વધુ માત્રામાં વિટામિન-Cની હાજરી જોવા મળી હતી.
પ્રયોગશાળાના અધિકારીઓ દ્વારા કરવામાં આવેલા સંશોધનમાં એવું ફળીભૂત થયું હતું કે, સરગવાની સીંગનું આવરણ અને તેના બીજમાં રહેલા તત્વો મહિલાઓમાં જોવા મળતાં બ્રેસ્ટ કેન્સરના કોષોને જળમૂળમાંથી નાબૂદ કરી શકે તેવા શક્તિશાળી જોવા મળ્યા હતા. તે માટે સરગવાની સીંગનું સેવન કેન્સર ધરાવતા દર્દીઓ પણ કરે તો તેને કેન્સરમાંથી મુક્તિ મળી જાય તેવી શક્યતાઓ હાલ ઉદ્ભવી રહી છે.
જૂનાગઢ કૃષિ યુનિવર્સિટી દ્વારા વખતોવખત ઘણા સંશોધનો કરવામાં આવ્યા હતા. આ સંશોધનોના અંતે કેટલાક પરિણામો લોક ઉપયોગી અને તબીબી વિજ્ઞાન માટે પણ આવકારદાયક હતા. થોડા વર્ષ પહેલા ગૌમૂત્ર પર કરેલા સંશોધનને અંતે એક ચોંકાવનારૂં સંશોધન પણ બહાર આવ્યું હતું. જે તે સમયે કરવામાં આવેલા સંશોધનમાં ગૌમૂત્રમાં પણ સોનાની હાજરી હોવાની પરખ થઇ હતી. આ સંશોધન પણ એગ્રીકલ્ચર યુનિવર્સિટી માટે ખૂબ મહત્વનું હતું. ત્યારે આજે ફરી વખત સરગવા પર કરેલા સંશોધન અને તેના તારણો બાદ સરગવામાં કેન્સરના કોષોને નાશ કરવાની શક્તિ જોવા મળી હતી. જેને લઇને ફરી એક વખત જૂનાગઢ એગ્રીકલ્ચર યુનિવર્સિટી તેની વિશેષ સિદ્ધિઓને લઈને સમગ્ર કૃષિ જગત માટે ઉદાહરણીય કામ કરી રહી છે.
