ભરઉનાળે રણજીતસાગરમાં ઠલવાશે નર્મદાના નીર

જામનગરઃ ચાલુ વર્ષે જામનગર જિલ્લામાં ઓછો વરસાદ પડવાથી પાણીની સમસ્યા ખૂબ જ થઈ રહી છે. આ પરિસ્થિતી વચ્ચે રાજ્ય સરકાર દ્વારા સૌની યોજનાનું લીંક કનેક્શન ન હોવા છતાં જામનગરની જીવાદોરી સમાન રણજીત સાગર ડેમમાં નર્મદાના નીર ઠાલવવા નિર્ણય કર્યો છે. આ નિર્ણય અંતર્ગત 2 માર્ચે નર્મદાના નીર રણજીત સાગર ડેમમાં ઠાલવવાનું શરૂ થશે.

માહિતી પ્રમાણે વરસાદ ન પડવાને કારણે જામનગર શહેરને પીવાનું પાણી પુરૂં પાડતાં જળાશયોમાં તળીયા દેખાઇ ગયા છે. તો બીજી તરફ મહત્વનો સ્ત્રોત ગણાંતા આજી-3 જળાશયને નર્મદાના નીરથી છલોછલ ભરી દેવામાં આવેલ છે. ત્યારે મુખ્યપ્રધાનએ જામનગરની પીવાના પાણીની સમસ્યા જોતાં રણજીતસાગરમાં નર્મદાના નીર ઠાલવવા અભુતપુર્વ નિર્ણય કર્યો હતો. આગામી દિવસોમાં વડાપ્રધાન જામનગર આવી રહ્યા છે, તે પૂર્વે ડેમને નર્મદાના નીરથી છલોછલ ભરી દેવાં તંત્ર દ્વારા તડામાર તૈયારી કરવામાં આવી છે.

સિંચાઇ વિભાગના અધિકારી ભરત ખખ્ખરે જણાવ્યુ કે, રણજીતસાગર ડેમથી 10.5 કી.મી. દુર સૌની યોજનાના પાણી નદીમાં ઠાલવવામાં આવશે. દુષ્કાળ જેવી પરિસ્થિતી હોવા છતાં વગર ચોમાસે રણજીતસાગર ડેમ છલોછલ ભરવા માટે તંત્રએ ખાસ પગલાં ભરતાં લોકોને પાણીની મુશ્કેલી નહીં પડે. જો કે, આગામી લોકસભા ચૂંટણી આવતી હોય લોકોને જરા પણ તકલીફ ન પડે તે માટે તંત્ર એક પછી એક પગલાં ભરી રહી હોવાનું પણ લોકોમાં ચર્ચાઈ રહ્યુ છે.