જામનગરઃ મહાનગરપાલિકામાં વોર્ડ નંબર 4ના શાસક પક્ષના મહિલા કોર્પોરેટરના વિસ્તારમાં છેલ્લા સમયથી કોઈ વિકાસ કામ થઈ રહ્યા નથી. જેથી તંત્રના વિરુદ્ધમાં મહિલા કોર્પોરેટરે સ્ટેન્ડિંગ કમિટી હોલ પાસે ધરણા કર્યા હતા. આ દરમિયાન પોલીસે આવીને તેમને રોકતા બંને વચ્ચે ઝપાઝપી થઈ હતી. જોકે, થોડીવાર બાદ મામલો થાળે પડતાં મહિલા કોર્પોરેટરે પોતાની સમસ્યા મીડિયા સમક્ષ જણાવી હતી.
જામનગરમાં મહિલા કોર્પોરેટરે સ્ટેન્ડિંગ કમિટી હોલ પાસે કર્યા ધરણા સત્તાધારી પક્ષના મહિલા કોર્પોરેટરે આક્ષેપ લગાવતા કહ્યું હતું કે, અનેકવાર રજૂઆત કરવા છતાં તેમના વિસ્તારમાં વિકાસના કામો થતાં નથી. જ્યારે પણ હું તંત્રમાં રજૂઆત કરું છું ત્યારે તેઓ અધિકારીઓ મને કમિટી સામે રજૂઆત કરવા કહે છે. પરંતુ કમિટી દ્વારા આ અંગે કોઈ કાર્યવાહી કરવામાં આવતી નથી. જેથી હું આજે ધરણા કરવા મજબૂર થઈ છું. આગળ રચના નદાણીયાએ જણાવ્યું હતું કે, વોર્ડ નંબર 4માં પુરતા સફાઈ કર્મીચારીઓ ન હોવાથી ગંદકીના ગંજ ખડકાયા છે. ભૂગર્ભ ગટર મામલે પણ અનેકવાર રજૂઆત કરવા છતાં અધિકારીઓ જવાબ આપતા નથી. આમ, સત્તાધારી પક્ષના કોર્પોરેટ રચના નદાણીયાને તંત્ર પાસેથી પૂરતી સુવિધા ન મળતાં વિસ્તારમાં વિકાસ કાર્યો થતાં ન હોવાના આરોપ કરી રહી છે.
