હાર્દિક પટેલે પત્રકાર પરિષદમાં વિકાસ કાર્યો અંગે કરી ચર્ચા

ગુજરાતના કોંગ્રેસના કાર્યકારી અધ્યક્ષ બન્યા બાદ પ્રથમ વખત હાર્દિક પટેલ આજે હાલરના પ્રવાસે આવ્યા છે. દ્વારકાધીશ મંદિરમાં દર્શન કર્યા બાદ હાર્દિકે પત્રકાર પરિષદનું આયોજન કર્યુ હતું અને પત્રકાર પરિષદમાં વિવિધ મુદ્દાઓ પર વાત કરી હતી.

જામનગરઃ ગુજરાતના કોંગ્રેસના કાર્યકારી અધ્યક્ષ બન્યા બાદ પ્રથમ વખત હાર્દિક પટેલ આજે હાલરના પ્રવાસે પહોંચ્યો હતો અને દ્વારકાધીશના દર્શન કર્યા બાદ પત્રકાર પરિષદનું આયોજન કર્યુ હતું. જેમાં તેણે વિવિધ મુદ્દાઓની ચર્ચા કરી હતી અને ખાસ કરીને ખેડૂતોની સમસ્યાના ઉકેલ લાવવાની વાત પર ભાર મૂક્યો હતો.

મહત્વના મુદ્દા

• ખેડૂતોને હજુ સુધી કોઇ સહાય કે સર્વે થયો નથી
• ખેડૂતો પાક વીમા દેવા માફી મામલે લડત અપાશે
• કોંગ્રેસનો દરેક સૈનિક ગુજરાતની જનતા માટે લડશે
• ગુજરાતમાં વિરોધની રાજનીતિ નહીં, પણ જનતાની તકલીફને લઇને લડવું

આમ, ઉપરોક્ત ખેડૂતોના વિવિધ મુદ્દાઓ વિશે ચર્ચા કર્યા બાદ પેટ્રોલ- ડિઝલ વિશે વાત કરી હતી. હાર્દિકે જણાવ્યું હતું કે, પેટ્રોલ ડિઝલ માટે કોંગ્રેસ રોડ પર આવીને લડશે તો હવે વિરોધ કરવા માટે નહિ પણ સમસ્યાનું પરિણામ લાવવા માટે લડત હશે. આ કોઇ ચૂંટણીલક્ષી પ્રવાસ નહિ. ગુજરાતના એક-એક લોકો માટે લડાઇ લડીશ. ગુજરાતમાં વિપક્ષ મજબૂત હતું અને હજુ રહેશે

આગળ વાત કરતાં હાર્દિકે કહ્યું હતું કે, "કોરોનાની મહામારીમાંથી જલદી બહાર આવીએ તેવી પ્રાર્થના કરીએ છીએ. વિરોધની રાજનીતિ કરતાં મુદ્દાની રાજનીતિથી લડીશું. ભાજપમાં મોટા ભાગના મંત્રી કોંગ્રેસના છે. તેમનો મૂળ ઇતિહાસ કોંગ્રેસનો છે. જ્યાં જયા જયંતી રવિ મુલાકાતે જાય છે ,ત્યાં કોરોના પોઝિટિવના આંક વધે છે."