ગીર સોમનાથમાં ટેકાના ભાવે મગફળીની ખરીદી શરૂ

રાજ્યમાં આજથી એટલે કે સોમવારથી ટેકાના ભાવે મગફળીની ખરીદી શરૂ કરવામાં આવી છે. શરૂઆતમાં ગીર સોમનાથમાં 30 ખેડૂતોને કેન્દ્ર સરકારની ગાઇડલાઇન્સ પ્રમાણે સોશિયલ ડિસ્ટન્સ સાથે બોલાવવામાં આવ્યા હતા. જેમાંથી માત્ર 7 ખેડૂતો જ હાજર રહ્યા હતા. આ સાથે જ આ વખતે પ્રથમ વખત ગીર સોમનાથ જિલ્લામાં CCTV કેમેરાની નજર હેઠળ સમગ્ર ખરીદી અને ચકાસણી પ્રક્રિયા હાથ ધરવામાં આવી છે. જેના કારણે મગફળી ખરીદીમાં વધારે પારદર્શકતા આવશે અને કોઈપણ સમસ્યાનો વહેલો ઉકેલ લાવી શકાશે.

• ગીર સોમનાથમાં ટેકાના ભાવે મગફળીની ખરીદી શરૂ
• 1,03,000 હેક્ટર જમીનમાં મગફળીનું થયું વાવેતર
• 90 દિવસ સુધી થશે ટેકાના ભાવે ખરીદી

ગીર સોમનાથ: સમગ્ર રાજ્યમાં આજથી એટલે કે સોમવારથી ટેકાના ભાવે મગફળીની ખરીદી શરૂ કરવામાં આવી છે, ત્યારે મગફળીનીમાં ચાલુ વર્ષે ગીર સોમનાથ તંત્રએ એક નવો નિયમ અમલમાં મૂક્યો છે. જેમાં કમોસમી માવઠા કે વરસાદથી ખરીદેલી મગફળી ભીંજાઈ નહીં તેના માટે ખરીદીના દિવસે જ મગફળીને સ્ટોરેજ સુધી પહોંચાડી દેવામાં આવશે. આ ઉપરાંત CCTV હેઠળ આ તમામ પ્રક્રિયા રેકોર્ડ કરવામાં આવશે. આ સાથે જ સરકારના ઉપરી અધિકારીઓ આ તમામ પ્રક્રિયાઓનું નિયંત્રણ કરશે.

21 હજાર ખેડૂતોએ રજિસ્ટ્રેશન કરાવ્યું

જિલ્લામાં 1,03,000 હેક્ટર જમીનમાં મગફળીનું વાવેતર કરવામાં આવ્યું છે અને કુલ 21 હજાર લોકોએ ટેકાના ભાવે મગફળી વહેંચવા ઓનલાઈન રજિસ્ટ્રેશન કરાવ્યું છે. જેમાં 90 દિવસ સુધી SMS કરીને ખેડૂતોને મગફળી વહેંચવા બોલાવવામાં આવશે. આ તમામ પ્રક્રિયા કેન્દ્ર સરકારની કોરોના ગાઈડલાઈન્સને અનુસરીને કરવામાં આવશે.