ગીર સોમનાથ જિલ્લાના મુખ્યમથક વેરાવળમાં કરોડો રૂપિયાની માતબર રકમે બનાવાયેલી આધુનિક સિવિલ હોસ્પિટલમાં ઘણાં સમયથી એક્સ-રે મશીન બંધ હાલતમાં છે. જેનો સરકારી તંત્ર દ્વારા કોઈ નિવેડો લાવવામાં આવ્યો નથી.
ગીર સોમનાથની સિવિલ હોસ્પિટલના એક્સ-રે મશીનનો મુદ્દો ધારાસભ્યએ વિધાનસભામાં ગજવ્યો
ગીર સોમનાથઃ જિલ્લાના વેરાવળમાં આવેલી સરકારી હોસ્પિટલમાં ઘણા સમયથી એક્સ-રે મશીન બંધ હાલતમાં હોવાથી દર્દીઓને હાલાકીનો સામનો કરવો પડી રહ્યો છે. જેથી આ મુદ્દાને સોમનાથના ધારાસભ્ય વિમલ ચુડાસમાએ વિધાનસભામાં ગજવ્યો છે.
gujarat assembly
અહીં સ્થાનિકો સહિત સોમનાથના દર્શને આવતા પ્રવાસીઓને પારાવાર મુશ્કેલીનો સામનો કરવો પડે છે. કારણ કે, કોઈ વ્યક્તિ ઈજાગ્રસ્ત થાય ત્યારે તેને પહેલા સરકારી હોસ્પિટલની બદલે ખાનગી હોસ્પિટલમાં એક્સ-રે કરાવવા જવું પડે છે. જેમાં વ્યક્તિને સમય, સુવિધા અને પૈસાની બરબાદી થાય છે. આ હોસ્પિટલ ગીર સોમનાથ જિલ્લા કક્ષાની સૌથી મોટી અને અધ્યતન સરકાર દ્વારા બનાવાયેલી છે.
આ હોસ્પિટલમાં ગરીબથી માંડી મધ્યમ વર્ગના લોકોના તમામ ગ્રામ્ય અને શહેરીજનો આ સરકારી હોસ્પિટલમાં સારવાર અર્થે આવતાં હોય છે. આ સંદર્ભે સોમનાથના ધારાસભ્ય વિમલ ચુડાસમાએ વિધાનસભા સત્રમાં સરકાર તેમજ આરોગ્ય પ્રધાન સમક્ષ રજૂઆત કરી છે. તેમજ ગીર-સોમનાથની હોસ્પિટલને નવું ડિઝિટલ અથવા જુનું એક્સરે મશીન રીપેર કરી આપવા માટે માંગણી કરી છે. ઉલ્લેખનીય છે કે, લાંબા સમયથી આ સમસ્યાનું સમાધાન ન આવતાં અંતે ધારાસભ્યએ વિધાનસભામાં આ મુદ્દો ગજવ્યો છે. ત્યારે હવે આગામી સમયમાં આ અંગે પગલાં લેવાય છે કે કેમ તે જોવું રહ્યું.