ગાંધીનગર : મળતી માહિતી મુજબ ગત 31 મેની રાત્રે સરગાસણમાં આવેલા એક ઇલેક્ટ્રોનિક શો રૂમનું શટર તોડી 2.65 લાખના 11 મોબાઇલની ચોરી કરી હતી. જેને લઇને શો રૂમના માલિક દ્વારા ઇન્ફોસિટી પોલીસ સ્ટેશનમાં ફરિયાદ દાખલ કરવામાં આવી હતી. જેના પગલે ચોરી કરનાર ચાર શખ્સોને ઝડપી લેવા માટે ગાંધીનગર લોકલ ક્રાઈમ બ્રાંચ દ્વારા તપાસ હાથ ધરવામાં આવી હતી.
ક્રાઇમ બ્રાંચની તપાસ દરમિયાન ભાવેશ દશરથ પંચાલ અને વૈભવ ઉર્ફે વિશાલ સંજય ડાભી ચોરીના મોબાઇલ વેચવા માટે ફરી રહ્યા હતા. જેમાં બે શખ્સો પાસે વધુ મોબાઈલ હોવાની પોલીસને બાતમી મળી હતી. જેના પગલે વોચ ગોઠવીને બંને શખ્સો મોબાઇલ વેચવા જઈ રહ્યા હતા. તે દરમિયાન પોલીસે રંગેહાથ ઝડપી લીધા હતા, ત્યારબાદ તેની પૂછપરછ હાથ ધરતા દસ દિવસ પહેલા સરગાસણમાં આવેલા ઇલેક્ટ્રોનિક શો રૂમમાંથી મોબાઇલની ચોરી કરી હોવાનું કબૂલ્યું હતું. જેના પગલે પોલીસે બન્ને આરોપીઓને ઝડપી લઇ આગળની કાર્યવાહી હાથ ધરી છે.
