રાજ્યના 40 તબીબ ભાજપના સદસ્ય બન્યા

ગાંધીનગર : દેશમાં ભારતીય જનતા પાર્ટી દ્વારા સદસ્યતા અભિયાન શરૂ કરવામાં આવ્યું છે. ગુજરાતમાં પણ ભાજપા દ્વારા મોટી સંખ્યામાં સદસ્ય બનાવવાનું અભિયાન હાથ ધર્યું છે. ત્યારે એક પછી એક નેતાઓ અભિનેતાઓ અને કલાકારોને સદસ્ય બનાવવામાં આવી રહ્યા છે. ત્યારે ગાયક કલાકારો બાદ બાદ 40 તબીબોને ભારતીય જનતા પાર્ટીના પ્રાથમિક સદસ્ય બનાવ્યા હતા.

ભાજપા પ્રદેશ કાર્યાલય ‘‘શ્રી કમલમ’’ કોબા, ગાંધીનગર ખાતે પદ્મશ્રી ડૉ. તેજસ પટેલ, પદ્મશ્રી ડૉ. સુધીર શાહ, ડૉ. નાગપાલ સાહેબ સહિત 40થી વધુ વિશ્વવિખ્યાત તબીબોને ભાજપનો ખેસ પહેરાવી વિધિવત્ રીતે ભાજપાના સભ્ય બનાવ્યા હતા. આ પ્રસંગે આયોજીત પત્રકાર પરિષદને સંબોધતા વાઘાણીએ જણાવ્યુ હતુ કે, ભાજપાની ‘‘રાષ્ટ્રપ્રથમ’’ની વિચારધારા તથા જનકલ્યાણકારી અને વિકાસની રાજનીતિને સ્વીકારીને પદ્મશ્રી ડૉ. તેજસ પટેલ, પદ્મશ્રી ડૉ. સુધીર શાહ, ડૉ. નાગપાલ સાહેબ સહિત 40થી વધુ નિશ્ર્ણાત તબીબો ભાજપામાં જોડાયા છે. ત્યારે હું આનંદ અને ગૌરવની લાગણી સાથે સૌનું ભાજપામાં હદયપૂર્વક સ્વાગત કરું છું.

1995 થી સતત ગુજરાતની જનતાએ ભાજપા પર ભરોસો રાખી અવિરત પ્રેમ વરસાવ્યો છે. 2017 વિધાનસભાની ચૂંટણીઓમાં પણ સતત છઠ્ઠીવખત ભાજપાનો વિજય ત્યારબાદ 2019ની લોકસભાની ચૂંટણીઓમાં પણ સતત બીજીવખત તમામ 26 બેઠકો પર ભાજપાનો ભવ્ય વિજય અપાવ્યો છે. જે સમગ્ર જનતાનો ભાજપા પ્રત્યેનો અતૂટ વિશ્વાસ દર્શાવે છે

પદ્મશ્રી અને વિશ્વવિખ્યાત કાર્ડિયોલોજીસ્ટ ડૉ. તેજસ પટેલે જણાવ્યુ હતુ કે, આઝાદીના સંઘર્ષ સમયે ગુજરાતની ધરતીના સપૂત મહાત્મા ગાંધી અને સરદાર વલ્લભભાઇ પટેલની જો.ડી.એ સમગ્ર દેશને નેતૃત્વ પુરું પાડ્યુ હતુ. આજે ગુજરાતના પનોતા પુત્રો વડાપ્રધાન નરેન્દ્રભાઇ મોદી અને કેન્દ્રીય ગૃહમંત્રી અમિતભાઇ શાહ દેશને નિર્ણાયક નેતૃત્વ પુરું પાડી રહ્યા છે. જમ્મુ-કાશ્મીરમાં 70 વર્ષ જુના પ્રશ્નનું નિરાકરણ સચોટ રાજકીય સુઝબુઝથી અતિસરળતાથી ગુજરાતની મોદી-શાહની જોડી લાવી છે.

પદ્મશ્રી ન્યુરોલોજીસ્ટ ડૉ. સુધીર શાહે જણાવ્યુ હતુ કે, દેશની સંસ્કૃતિ-શાલિનતા-સાર્વભૌમત્વ-સહિષ્ણુંતાના રક્ષણની વિચારધારા સાથે કાર્ય કરતી ભાજપાનો ખેસ પહેરી હું અત્યંત ગૌરવની લાગણી અનુભવું છું. આમ 40 તબીબો ભારતીય જનતા પાર્ટીના પ્રાથમિક સદસ્ય બનાવ્યા હતા.