Teachers in Education Conference : દેશના શિક્ષકોએ સ્પષ્ટ કર્યું ચિત્ર, 3 મહિના સુધી સેલેરી નહીં, વિદ્યાર્થીઓ માટે જ સમય નથી

ગુજરાતમાં પ્રથમવાર રાષ્ટ્રીય શિક્ષક અધિવેશનમાં પીએમ મોદીની પ્રેરક વાતો શિક્ષકોએ વખાણી. શિક્ષકોના મૂલ્યો વિશે વાતો તો ખૂબ થતી હોય પરંતુ શિક્ષક પણ જીવંત વ્યક્તિ છે અને તેના પણ વિકટ પ્રશ્નો હોય છે જે ઉકેલાય તો વધુ સારી રીતે કાર્ય થઇ શકે, શિક્ષકોએ કેટલાક મુદ્દા એવા પણ રજૂ કર્યાં કે વિચાર કરવો પડે.

ગાંધીનગર:ગુજરાતમાં ઓલ ઇન્ડીયા પ્રાઇમરી ટીચર ફેડરેશનનું 29નું રાષ્ટ્રીય શિક્ષક અધિવેશન યોજાઇ ગયું. જેમાંં દેશના 24 રાજ્યના પ્રાથમિક શિક્ષક સંઘના સદસ્યો ગુજરાતના ગાંધીનગર ખાતે આવેલા વલાદ ગામે હાજર થયા હતા. અધિવેશનનું ઉદ્ઘાટન વડાપ્રધાન નરેન્દ્ર મોદી દ્વારા કરવામાં આવ્યું હતું. અધિવેશનમાં આવેલા શિક્ષકો સાથે પીએમ મોદીએ રજૂ કરેલી બાબતો અને તેમનું શું કહેવું હતું તે જાણવાનો પ્રયાસ કર્યો હતો.

શિક્ષકોને સંબોધન કરતાં વડાપ્રધાન નરેન્દ્ર મોદીએ નવી શિક્ષણનીતિ શિક્ષકોની ફરજ વિદ્યાર્થીઓની ફરજ અને આગામી સમયમાં કેવું ભણતર હોવું જોઈએ તે બાબતે સરસ વાતો રજી કરી હતી. પરંતુ શિક્ષક વર્ગનો વિકાસ કેવો છે તે વિશે ખણખોદ કરી તો તેમના જે પ્રશ્નો સામે આવ્યાં તે વિચારણીય બની રહે તેવા છે.

પીએમે મુખ્ય ચારથી પાંચ વાતો અમારી સામે મૂકીદિલ્હીથી આવેલાં શિક્ષિકા સીમા માથુરે ઈટીવી ભારત સાથેની વાતચીતમાં જણાવ્યું હતું કે આજે હું ખૂબ જ ગર્વ અનુભવું છું કે આજે અમારા અધિવેશનના 35 વર્ષ બાદ વડાપ્રધાન નરેન્દ્ર મોદી આવ્યા છે અને તેઓએ પ્રાથમિક શિક્ષકોને સંબોધિત કરતા નવી એજ્યુકેશન પોલીસી બાબતે પણ ચર્ચા કરી છે. ઉપરાંત મુખ્ય ચારથી પાંચ વાતો અમારી સામે મૂકી છે. જેમાં કેવી રીતે શાળાનો સ્થાપના દિવસ ઉજવીને વિદ્યાર્થીઓમાં એક અનોખો માહોલ ઊભા કરી શકીએ, મિડ ડે મીલ અને નવી શિક્ષણનીતિમાં માતૃભાષામાં અભ્યાસ કરાવવાના ઉલ્લેખ છે ત્યારે આનાથી શિક્ષકોની શૈલીને ખૂબ જ નિખારશે. ઉપરાંત બાળકોને પણ શીખવામાં સરળતા રહેશે.

શિક્ષકો માટે અધિવેશન ચેન્જ મેકર છે.વર્તમાન શિક્ષણનીતિ અને આવનારી શિક્ષણનીતિમાં ખૂબ જ મોટો ફરક લાવવામાં આવ્યો છે નવી શિક્ષણનીતિમાં બાળકોનો સર્વગ્રાહી વિકાસ થાય તે રીતનું આયોજન છે જય નવા શિક્ષણનીતિ મુજબ આ એક જ અમારા શિક્ષકો માટે મહત્વનો મુદ્દો છે કે બાળકો માટે કેવી રીતે ઓલ રાઉન્ડ ડેવલોપમેન્ટ કરી શકીએ. અને આજ નવી શિક્ષણનીતિમાં અમારા માટે પણ એ ખૂબ ખૂબ સાદો નવો સેટઅપ ઊભો કરવામાં આવ્યો છે. સીમા માથુર, (શિક્ષિકા દિલ્હી)

દિલ્હી મોડલ સારું પણ સેલેરી અનિયમિત : અન્ય એક શિક્ષિકા રીના દહીંયા જેઓ પણ દિલ્હીથી આવ્યાં હતાં તેમણે ઈટીવી ભારત સાથેની વાતચીતમાં જણાવ્યું હતું કે હું ગુજરાતના એજ્યુકેશન મોડેલથી વાકેફ નથી. પરંતુ દિલ્હીના એજ્યુકેશન મોડેલથી સારી રીતે જાણકાર છું અને દિલ્હી સરકાર સ્કૂલો ઉપર અને શિક્ષણ ઉપર સારું ધ્યાન આપે છે. શિક્ષકો સારા છે. દિલ્હીમાં સૌથી મોટો મુદ્દો એજ્યુકેશનનો જ છે.

શિક્ષકોને અનેક પ્રકારની ફરિયાદ છે. જેમાં શિક્ષકોને સમયસર પગાર પ્રાપ્ત થતો નથી જે માટે અમે ખરેખર પરેશાન છીએ. દર વખતે સેલેરી લેવા માટે અમારે યુનિયનને જાણ કરવી પડે છે. આંદોલન કરવું પડે છે અને કોર્ટમાં પિટિશન પણ દાખલ કરવી પડે છે. જ્યારે મેં નોકરીની શરૂઆત કરી હતી ત્યારે છ મહિના સુધી મને સેલેરી પ્રાપ્ત થઈ ન હતી. જ્યારે ત્રણથી છ મહિના સુધી સેલેરી મોડી પ્રાપ્ત થાય છે. રીના દહીયા (શિક્ષિકા દિલ્હી)

સરકારે શિક્ષકોને ટ્રેનિંગ આપવી જોઈએ : દિલ્હી સરકારની શાળાના શિક્ષક નવીન સંગવાનએ ઈટીવી ભારત સાથેની વાતચીત કરતા જણાવ્યું હતું કે જે રીતની કેન્દ્ર સરકાર દ્વારા નવી એજ્યુકેશન પોલીસી લાવવામાં આવી છે તેને ધ્યાનમાં લઈને સરકારે શિક્ષકોને પણ શિક્ષણની ટ્રેનિંગ આપવી જોઈએ. જેથી વધુ સારું શિક્ષણ બાળકો પ્રાપ્ત કરી શકે.

દિલ્હી સરકાર તેમના શિક્ષકોને આઇઆઇટી અને વિદેશમાં ટ્રેનિંગ માટે મોકલી રહ્યા છે. જેનો ફાયદો બાળકોને થઈ રહ્યો છે. દિલ્હીમાં જે ખાનગી શાળાઓનું પરિણામ નથી આવતું તેવી સરકારી શાળાઓના વિદ્યાર્થીઓ JEE અને NEET પરીક્ષામાં સારો સ્કોર મેળવે છે. જેથી તમામ સરકારે આવું કરવું જોઇએ.

શિક્ષકોને વિધાર્થીઓ માટે પૂરતો સમય નથી મળતો : હરિયાણા શિક્ષક સંઘ પ્રેસિડેન્ટ રાજબીરસિંહ રાગીએ ઈટીવી ભારત સાથેની વાતચીતમાં જણાવ્યું હતું કે હરિયાણામાં પણ શિક્ષકોની સમસ્યા છે. હરિયાણામાં શિક્ષકોને વિદ્યાર્થીઓ માટે સમય નથી કારણકે સરકાર શિક્ષકો પાસેથી અલગ અલગ પ્રકારના અન્ય કામો કરાવી રહ્યા છે.

હાલમાં પરિસ્થિતિ એવી ઊભી થઈ છે કે શિક્ષકોની સંખ્યા ઓછી હોય છે પરંતુ વિદ્યાર્થીઓની સંખ્યામાં સતત વધારો થઈ રહ્યો છે, જ્યારે શિક્ષકો પાસે થી અભ્યાસ ઉપરાંત અન્ય 25 જેટલા કામો કરાવે છે. ટ્રાન્સફર પોલિસીમાં સરકારે દર વર્ષે બદલીની વાત કરી હતી, પણ પ્રાથમિક શાળાના શિક્ષકોની બદલી જ થતી નથી. રાજબીરસિંહ રાગી (હરિયાણા શિક્ષક સંઘ પ્રમુખ)

સમસ્યાઓનું સમાધાન જરુરી : દેશભરમાંથી ગુજરાતમાં 29માં રાષ્ટ્રીય શિક્ષક અધિવેશનમાં ગાંધીનગરમાં આવેલા શિક્ષકોએ જે પ્રશ્નો રજૂ કર્યાં તેમાના ઘણા મુદ્દાઓથી ગુજરાતના શિક્ષકો પણ પરેશાન છે. પછીએ પગારનો મુદ્દો હોય કે શિક્ષણ સિવાયની અન્ય વધારાની કામગીરીનો બોજ શિક્ષકના માથે નાખી દેવામાં આવે તેનો હોય. શિક્ષકની મજબૂતી વધારવાના પ્રયાસો દરમિયાન શિક્ષણજગતની સમસ્યાઓનું સમાધાન થવાની વાજબી માગણીઓ ક્યારે ધ્યાને લેવાશે તે વિશે હાલમાં તો કહી શકાય તેમ નથી.