ગાંધીનગરઃ રાજ્યમાં વધતાં કોરોના સંક્રમણને ધ્યાનમાં રાખીને રાજ્યસરકારે લોકોના હિતને ધ્યાનમાં રાખીને ખાનગી લેબોટરીની ફીમાં ઘટાડો કરવાનો નિર્ણય લીધો છે. જેના પગલે ટેસ્ટમાં લેવાતી રૂપિયા 4500ની ફી ઘટાડીને રૂપિયા 2500 કરાઈ છે.
આ નિર્ણયનો અમલ આજથી કરાશે અને જો કોઈ ખાનગી લેબોરેટરી આ નિયમનું ઉલ્લંઘન કરશે તો તેનું લાયસન્સ રદ કરવામાં આવશે.
ઉલ્લેખનીય છે કે, કોરોનાના ટેસ્ટીંગની કામગીરી હાલ રાજ્ય સરકારની માલિકીની હૉસ્પિટલો અને મેડીકલ કોલેજોમાં વિનામૂલ્યે કરવામાં આવી રહી છે. અંદાજે દરરોજના 4000થી 4500 જેટલા ટેસ્ટ કરવામાં આવે છે.
તાજેતરમાં રાજ્ય સરકારે નિર્ણય લીધો હતો કે, દર્દીમાં કોરોનાના લક્ષણો જણાય તો એમ.ડી. ફીઝીશ્યન ડોક્ટરો જો ટેસ્ટીંગ માટે અભિપ્રાય આપે, તો ખાનગી હૉસ્પિટલોમાં દર્દીઓ કોરોનાનો ટેસ્ટ કરાવી શકશે. આ ખાનગી લેબોરેટરીઓ ટેસ્ટીંગની કિંમત રૂપિયા 4500 વસૂલતી હતી.
હાલ, ખાનગી લેબોરેટરીમાં ટેસ્ટીંગના ચાર્જ રૂપિયા 4500 લેવાતા હતા, જેમાં ઘટાડો કરીને રૂપિયા 2500 લેવામાં આવશે. તેમજ ટેસ્ટીંગ માટે દર્દીઓ લેબોરેટરીના માણસોને ઘરે કે હોસ્પિટલમાં બોલાવે ત્યારે ખાનગી લેબે તેનો ચાર્જ રૂપિયા 3000 લેવાનો રહેશે.
રાજ્ય સરકારે કોરોના ટેસ્ટીંગ માટે ખાનગી લેબોરેટરીમાં જે ચાર્જ લેવાતો હતો. જેમાં રૂપિયા 2000થી 1000નો ઘટાડો કરવામાં આવ્યો છે. હવેથી ખાનગી લેબોરેટરીઓને ફરજિયાતપણે આ ભાવ પ્રમાણે ફી લેવાની રહેશે અને જો તે વધુ ફી લેશે તો તે લેબોરેટરીની માન્યતા રદ કરવામાં આવશે.
