શાર્પ શૂટરના મોબાઈલમાંથી ગોરધન ઝડફિયા અને કમલમના વીડિયો મળ્યા, એકની ધરપકડ બીજાની તપાસ શરૂ : પ્રદીપસિંહ જાડેજા

ભાજપના દિગ્ગજ નેતા ગોરધન ઝડફિયા પર હુમલો કરવા આવેલા છોટા શકીલના સાગરિતો દ્વારા ગઇકાલે બુધવારે મોડી રાત્રે અમદાવાદ ક્રાઇમ બ્રાન્ચ અને એન્ટી ટેરરિસ્ટ સ્ક્વોડ (ATS) પર હુમલો કરવામાં આવ્યો હતો. જેના વળતા જવાબમાં ATS અને અમદાવાદ ક્રાઇમબ્રાન્ચ દ્વારા એક આરોપીની ધરપકડ કરવામાં આવી છે, જ્યારે બીજા આરોપીની તપાસ શરૂ કરવામાં આવી છે.

ગાંધીનગર : આ સમગ્ર ઘટના મામલે રાજ્યના ગૃહ પ્રધાન પ્રદીપસિંહ જાડેજાએ જણાવ્યું કે, છોટા શકીલના સાગરિતો દ્વારા ગઇકાલે મોડી રાત્રે અમદાવાદના રીલીફ રોડ વિસ્તારમાં આવેલી વિનસ હોટલમાં અમદાવાદ ક્રાઇમ બ્રાન્ચ અને ATS દ્વારા તપાસ કરવામાં આવી હતી.

પોલીસને માહિતી મળી હતી કે, ભાજપના દિગ્ગજ નેતા ગોરધન ઝડફિયા પર જાનલેવા હુમલો થવાનો છે, ત્યારે પોલીસ તપાસ અર્થે જતા ક્રાઈમ બ્રાન્ચના અધિકારી અને ATSના અધિકારીઓ ઉપર શાર્પ શૂટરો દ્વારા ફાયરિંગ કરવામાં આવ્યું હતું. જેમાં પોલીસના જાંબાજ અધિકારીઓએ વળતો હુમલો કરી એક શાર્પ શૂટરની ધરપકડ કરી હતી. જે બાદ પોલીસે તપાસ હાથ ધરી છે, જ્યારે તેની સાથે રહેલા બીજા અન્ય શાર્પ શૂટરને શોધવા માટે ચક્રો ગતિમાન કર્યા છે.

મળતી માહિતી પ્રમાણે ATS દ્વારા જે આરોપીની ધરપકડ કરવામાં આવી છે, તેનું નામ ઈરફાન ઇલ્યાસ શેખ છે. ઈરફાન ઇલ્યાસ શેખ પાસેથી બે હથિયાર પણ જપ્ત કરવામાં આવ્યા છે. જ્યારે આ હુમલો ગુજરાત ભાજપના નેતા ગોરધન ઝડફિયા પર કરવાનો હતો. જો કે હુમલો કરે તે પહેલા જ ATSએ આખા ષડયંત્રને નિષ્ફળ કર્યું છે. પ્રદિપસિંહ જાડેજાએ વધુમાં જણાવ્યું હતું કે, જે આરોપીની ધરપકડ કરવામાં આવી છે, તેના મોબાઇલમાં ટેકનિકલ રીતે તપાસ કરતા ગોરધન ઝડફિયાના ફોટા, વીડિયો હોવાનું સામે આવ્યું છે. ઉલ્લેખનીય છે કે, ગોરધન ઝડફિયા અત્યારે ગુજરાત રાજ્યના ભાજપ પ્રમુખ સી.આર.પાટીલ સાથે સૌરાષ્ટ્રના પ્રવાસે છે, ત્યારે ગોરધન ઝડફિયાની સુરક્ષામાં વધારો કરવા માટે રાજ્ય સરકારે DGPને આદેશ આપ્યા છે.