LRD આત્મહત્યા મામલો, માલધારી આગેવાનો રાજ્ય સરકાર સાથે બેઠક કરશે

ગાંધીનગર: રાજ્યમાં LRDની પરીક્ષા બાદ રાજ્ય સરકારે ખોટા સર્ટિફિકેટનું કારણ આપીને અનેક SC, ST અને OBCના સર્ટિફિકેટ રદ કર્યા હતાં. જેમાં જૂનાગઢના બે વિદ્યાર્થીઓના પણ સર્ટિફિકેટ રદ થયા હતાં. ત્યારબાદ LRD પરીક્ષાના ઉમેદવારના પિતાએ જૂનાગઢમાં આત્મહત્યા કરી હતી. જેને પગલે માલધારી સમાજ રસ્તા પર ઉતરી આવ્યો અને રાજ્ય સરકારનો વિરોધ કરી રહ્યો હતો. ત્યારે માલધારી સમાજને મનાવવા અને ડેમેજ કન્ટ્રોલ કરી શકાય તે હેતુથી રાજ્યના પૂર્વ પંચાયત પ્રધાન રણછોડ દેસાઈએ મધ્યસ્થીની ભૂમિકા ભજવીને મામલો થાળે પાડયો હતો. ત્યારબાદ જૂનાગઢમાં મૃતકના પરિજનોએ મૃતદેહ સ્વીકાર્યો હતો.

આ બાબતે રાજ્યના પૂર્વ પંચાયત પ્રધાન રણછોડ દેસાઈએ ઈટીવી ભારત સાથે ખાસ વાતચીતમાં જણાવ્યું હતું કે, જે SC-STના સર્ટિફિકેટ રદ થયા હતા. તે બન્ને ઉમેદવારો પરીક્ષામાં પાસ હતા પરંતુ તેઓને નોકરી મળી નહોતી. જેથી તેમના પિતાને લાગી આવ્યું અને તેમણે આત્મહત્યા કરી હતી. હવે આ મામલે સમાધાન કરવામાં આવ્યું છે. માલધારી સમાજ અને રાજ્ય સરકાર વચ્ચે સંમતિ થઈ છે અને જૂનાગઢમાં મૃતકના પરિવારજનો દ્વારા મૃતદેહ સ્વીકારવામાં આવ્યો છે. આ ઉપરાંત 26 જાન્યુઆરી બાદ સરકારે જે પરિપત્ર બહાર પાડ્યો છે તે પરિપત્ર અને લઈને પણ સરકાર સાથે ચર્ચા કરવામાં આવશે.