ગુજરાત પોલીસ એકેડેમી ગાંધીનગર ખાતે આજે રવિવારે સેરેમોનિયલ પરેડમાં ભારતના ઉપરાષ્ટ્રપતિ એમ. વેંકૈયા નાયડુના હસ્તે ગુજરાત પોલીસને 'રાષ્ટ્રપતિનું નિશાન' એનાયત કરવામાં આવ્યું હતું. ખાસ રીતે ડિઝાઇન કરવામાં આવેલા ધ્વજ અને વિશેષ પ્રતિક ગુજરાત પોલીસને ભારતના ઉપરાષ્ટ્રપતિ દ્વારા એનાયત કરવામાં આવ્યું હતું. ગુજરાત પોલીસને રાષ્ટ્રપતિનું નિશાન એનાયત કરવામાં આવે તે પહેલા પોલીસની અલગ અલગ પ્લાટુન દ્વારા પરેડ યોજવામાં આવી હતી. પરેડ કરી રહેલા જવાનોએ ઉપસ્થિત રહેલા જવાનોએ સૌ કોઈને મંત્રમુગ્ધ કરી દીધા હતા.
ઉપ રાષ્ટ્રપતિના હસ્તે ગુજરાત પોલીસનું ‘રાષ્ટ્રપતિ નિશાન’થી સન્માન ઉપરાષ્ટ્રપતિ એમ વેંકૈયા નાયડુ દ્વારા ગુજરાત પોલીસને નિશાનનું સર્વોચ્ચ સન્માન આપવામાં આવે તે પહેલા હિંદુ, મુસ્લિમ, શીખ અને ઈસાઈ ધર્મના ગુરુઓ દ્વારા દસ મિનિટ સુધી પોતાના ધર્મનો ગ્રંથ હાથમાં લઈને પઠન કર્યું હતું. ત્યારબાદ આ સન્માનને રાષ્ટ્રપતિએ જવાનોના હાથમાં આપ્યું હતું. તે દરમિયાન પોલીસ જવાનોએ ફાયર કરીને ખુશી વ્યક્ત કરી હતી. જ્યારે અલગ-અલગ પ્લાટુન દ્વારા મેદાનમાં પરેડ કરી હતી. તે દરમિયાન ત્રણ મહિલા પોલીસ જવાનો સમયાંતરે જમીન ઉપર ઢળી ગઈ હતી
રાજયના મુખ્યપ્રધાન વિજય રૂપાણીએ જણાવ્યું કે, ગુજરાત માટે આજે ઐતિહાસિક અને આનંદનો અવસર છે. જે દાયકા બાદ ગુજરાત પોલીસને સર્વોચ્ચ સન્માન પ્રાપ્ત થયું છે. ગુજરાત પોલીસની 58 વર્ષની યાત્રા રહી છે. જેમાં અક્ષરધામ ઉપરના હુમલાથી લઈને અમદાવાદ સિવિલ હોસ્પિટલમાં બ્લાસ્ટ સુધીના બનાવો બન્યા છે. જેમાં ગુજરાત પોલીસે સરાહનીય કામગીરી કરી હતી. હજુ પણ રાજ્યમાં પડકારો અનેક છે. પરંતુ ગુજરાતને અપરાધ મુક્ત બનાવવા ગુજરાત પોલીસ પડકાર ઝીલી લેશે.
ઉપરાષ્ટ્રપતિ એમ વેંકૈયા નાયડુએ કહ્યું કે, આજે મને ગુજરાત પોલીસને સર્વોચ્ચ સન્માન આપવાનો અવસર પ્રાપ્ત થયો છે. વિશ્વના મોટા દેશમાં કાયદો જાળવવો મુશ્કેલી ભર્યું કામ છે. પોલીસ મુસીબતમાં ફસાયેલા લોકોને બચાવવાનું કામ કરે છે. ત્યારે પોલીસ વિભાગમાં માનવ સંસાધનની કમી છે, તેને ઝડપી પૂરી કરવી જોઈએ. આપણા દેશમાં આદિકાળથી પુરાણોમાં મહિલાઓને સન્માન આપતા આવ્યા છીએ. આપણે પોતાની ધરતીને માતૃભૂમિ કહીએ છીએ, પિતૃભૂમિ નથી કહેતા. ત્યારે જે બનાવો બની રહ્યા છે. તેના માટે ગુજરાત પોલીસે કામ કરવું પડશે.
