ગાંધીનગર : રાજ્યમાં કોરોના વાઇરસના આંકડામાં સતત વધારો જોવા મળી રહ્યો છે. લોકડાઉનની અફવા વચ્ચે રાજ્યમાં 24 કલાકમાં 580 કેસ સામે આવ્યા છે. જ્યારે કોરોના વાઇરસના કારણે છેલ્લા 24 કલાકમાં સારવાર લઈ રહેલા સૌથી વધુ 25 દર્દીના મોત થયા છે. રાજ્યમાં કોરના વાઇરસના કુલ 27317 પોઝિટિવ કેસ અત્યાર સુધીમાં નોંધાયા છે. જોકે, છેલ્લા 24 કલાકમાં રાજ્યમાંથી રવિવારે 655 દર્દીઓ સ્વસ્થ્ય થતા તેમને રજા પણ આપવામાં આવી છે.
રાજ્યમાં 24 કલાકમાં 580 કોરોના કેસ નોંધાયા ગુજરાત કોરોના વાઇરસના કેસમાં મહારાષ્ટ્ર બાદ બીજા નંબરે છે. જ્યારે રાજ્ય 30 હજાર આંકડા તરફ આગળ વધી રહ્યુ છે. ત્યારે રાજ્યમાં છેલ્લા 24 કલાકમાં અમદાવાદમાં 273, સુરત 176, વડોદરામાં 41, ગાંધીનગર 15, ભરૂચ 10, ભાવનગર, જામનગર 8-8, વલસાડ 5, રાજકોટ, આણંદ, પંચમહાલ, પાટણ, અમરેલી 4-4, બનાસકાંઠા, સાબરકાંઠા 3-3, મહેસાણા, જુનાગઢ 2-2, ખેડા, બોટાદ, દાહોદ, સુરેન્દ્રનગર અને દેવભૂમિ દ્વારકામા 1-1 કેસ નોંધાયો છે. જ્યારે 59 દર્દી વેન્ટિલેટર ઉપર રાખવામાં આવ્યાં છે. અત્યાર સુધી 1664 લોકોના મોત થયાં છે. જ્યારે અમદાવાદમા રાજ્યમાં સૌથી વધું 18837 કેસ થયાં છે. રાજ્યમાં સૌથી વધુ કેસ પાંચ મહાનગરોમાં સામે આવી રહ્યા છે. તેવા સમયે છેલ્લા 24 કલાકમાં સુરતમાં બોમ્બ ફૂટયો છે. સુરતના અલગ-અલગ વિસ્તારમાં 176 કેસ એક સાથે સામે આવ્યા છે, જે અત્યાર સુધીનો સૌથી મોટો આંકડો સુરત માટે છે. રાજ્યમાં લોકડાઉન પૂરું કરી દેવામાં આવી છે, પરંતુ આંકડામાં સતત્ત વધારો થઈ રહ્યો છે. છેલ્લા 24 કલાકમાં રાજ્યનો આંકડો પણ 600 ની નજીક પહોંચી ગયો છે. અત્યાર સુધી માત્ર 500ની આસપાસ આંકડો સરકાર દ્વારા જાહેર કરવામાં આવતો હતો ત્યારે રવિવારે 580 કેસ એક સાથે સામે આવ્યા છે, જે ચિંતાજનક બાબત છે.
