રાજ્યપાલની હાજરીમાં IITEનો બીજો પદવીદાન સમારોહ યોજાયો

ગાંધીનગરઃ મહાત્મા મંદિર ખાતે ભારતીય શિક્ષક પ્રશિક્ષણ સંસ્થાન(IITE)નો દ્વિતીય પદવીદાન સમારોહ યોજાયો હતો. જેમાં રાજ્યપાલ આચાર્ય દેવવ્રત અને શિક્ષણ પ્રધાનના હસ્તે વિવિધ ફેકલ્ટીના 271 વિદ્યાર્થીઓને પદવી એનાયત કરવામાં આવી હતી.

ગુજરાતના રાજ્યપાલ આચાર્ય દેવવ્રતે ગાંધીનગર સ્થિત ભારતીય શિક્ષક પ્રશિક્ષણ સંસ્થાનના દ્વિતીય પદવીદાન સમારોહમાં તેજસ્વી વિદ્યાર્થીઓને પદવી આપતા જણાવ્યું હતું કે, માતા-પિતા બાળકને જન્મ આપે છે, જ્યારે શિક્ષક તે બાળકમાં સંસ્કારોનું સિંચન કરી જીવન જીવવાનો માર્ગ બતાવે છે.

પદવી ગ્રહણ કરતા વિદ્યાર્થીઓ ભવિષ્યમાં શિક્ષક બનવાના છે. તેમને સંબોધતાં જણાવ્યું હતું કે, ભારતીય સંસ્કૃતિએ શિક્ષકોને ઇશ્વરનું સ્વરૂપ માન્યું છે. જ્યારે શિક્ષક ઇમાનદારીથી ફરજ પાલન કરશે તો શ્રેષ્ઠ રાષ્ટ્રનું નિર્માણ થઈ શકશે. માતા-પિતાના લાલન-પાલનમાં ઉછરેલું બાળક શિક્ષકની પાસેથી જીવન ઘડતરના પાઠ શીખે છે. માનવ નિર્માણ અને શ્રેષ્ઠ નાગરિકોનું નિર્માણનું કાર્ય અતિ કઠિન અને અત્યંત આવશ્યક છે. આ મહાન કાર્ય માત્ર શિક્ષકોની ફરજમાં આવે છે.

શિક્ષણપ્રધાન ભૂપેન્દ્રસિંહ ચૂડાસમાએ IITEમાંથી ડિગ્રી, ગોલ્ડ મેડલ પ્રાપ્ત કરનાર વિદ્યાર્થીઓને અભિનંદન આપતાં કહ્યું કે, શિક્ષક આજીવન વિદ્યાર્થી રહે છે. તેને સતત ભણતા રહેવું જોઇએ. શિક્ષણનો વ્યવસાય સતત અને કાયમી ચાલતો વ્યવસાય છે. વિદેશમાં શિક્ષકોની માગ થશે, તો ચોક્કસ આપની સંસ્થાના વિદ્યાથીઓની યાદી હું ત્યાં મોકલી આપીશ. આપ ગુજરાતનું નામ ઉજ્જવળ કરશો તેનો મને વિશ્વાસ છે.

આ સમારોહમાં રાજ્યપાલના હસ્તે બી.એ., બી.એડ.-6, બી.એસ.સી. બી.એડ.-39, એમ.એ.-2, એમ.એસ.સી.-25, એમ.એસ.સી. એમ.એડ.-09, એમ.એ. ઇન એજ્યુકેશન બેચ-1માં 65, બેચ-2માં 108 અને બેચ-3માં 17 મળી કુલ 271 વિદ્યાર્થીઓને પદવી એનાયત કરવામાં આવી હતી. તેમજ તમામ ફેકલ્ટીમાં પ્રથમ, દ્વિતીય અને તૃતિય ક્રમનાં વિદ્યાર્થીઓને મેડલ આપી સન્માનિત કરવામાં આવ્યા હતા.