ગાંધીનગર સિવિલમાં કોરોના સામે ઝઝૂમતી મહિલાએ જણાવી આપવીતી, જુઓ વીડિયોમાં શું કહ્યું...

રાજ્યના આરોગ્ય પ્રધાન અને અગ્ર સચિવ ગુજરાતમાં કોરોના વાઇરસની સ્થિતિ ખૂબ જ સારી છે તેવું પ્રેસ કોન્ફરન્સ કરીને જણાવી રહ્યા છે. દર્દીને તમામ સુવિધાઓ મળી રહી છે તેવા બણગા પણ ફૂંકી રહ્યા છે, પરંતુ વાસ્તવિકતા શું છે, તે હવે દર્દીઓ પોતાનો વીડિયો બનાવીને જણાવી રહ્યા છે. ગાંધીનગર સિવિલમાં આવેલા 801 વોર્ડમાં કોરોનાની સારવાર લઈ રહેલી મહિલા સાંભળો શું કહી રહી છે.

ગાંધીનગર: સિવિલમાં દર્દીઓની પૂરતી સંખ્યા પ્રમાણે તબીબોનો સ્ટાફ નથી. રાજ્ય સરકાર જ્યાંથી વહીવટ કરે છે, ત્યાંથી બે કિલોમીટર દૂર આવેલી હોસ્પિટલમાં જ સામાન્ય દર્દીઓની હાલત કફોડી થઇ રહી છે. અમદાવાદ સિવિલ હોસ્પિટલના પગલે હવે ગાંધીનગર સિવિલ હોસ્પિટલ જઈ રહી છે. સિવિલના નામથી હવે સારવાર લેવા આવતા દર્દીઓ થર થર કાપી રહ્યા છે. અગ્ર સચિવ જયંતિ રવિ પોતાની બદનામી થઈ ત્યારબાદ ગુજરાતની સિવિલ હોસ્પિટલોમાં મુલાકાત ગોઠવી રહ્યા છે, પરંતુ હજુ સુધી ગાંધીનગર સિવિલ હોસ્પિટલમાં એક પણ મુલાકાત લીધી નથી.

રાજ્યના આરોગ્ય પ્રધાન નીતિન પટેલ પણ ધમણનું શુભારંભ કરવા અમદાવાદ ગયા તે પણ હાઇકોર્ટની ટકોર બાદ નીકળ્યા હતાં, પરંતુ ગાંધીનગર સિવિલ હોસ્પિટલમાં કોઈ અધિકારી કે પદાધિકારી દર્દીઓની સ્થિતિ જોવા માટે ફરકયા નથી, ત્યારે કોરોના વાઇરસ માટે દાખલ કરવામાં આવેલી ગાંધીનગર સિવિલ હોસ્પિટલમાં મહિલા પોતાની આપવીતી કહી રહી છે કે, અહીંયા કોઈ સારવાર કરવા વાળું નથી, દવા પણ જાતે લઇ લેવા માટે જણાવવામાં આવી રહ્યુ છે. હવે ધીરે ધીરે ગુજરાત મોડલની પોલ ખુલી રહી છે. જ્યારે સાંભળો આ મહિલા શું કહી રહી છે?.