દેવભૂમિ દ્વારકાઃ સુરક્ષા સેતુ સોસાયટી દ્વારા ગરબાનું આયોજન

દેવભૂમિ દ્વારકાઃ જિલ્લા પોલીસ પરિવાર દ્વારા દર વર્ષે સુરક્ષા સેતુ સોસાયટી અંતર્ગત નવરાત્રી મહોત્સવનું આયોજન કરવામાં આવે છે. આ યોજનાનો હેતુ પોલીસ અને પ્રજાના સંબંધ વધુ મજબૂત બને તેવો છે. જો પોલીસ અને જનતા વચ્ચે પારદર્શિતા વધે તો સમાજને અનેક ફાયદા થઈ શકે છે અને સાથે ગુનાખોરીનું પ્રમાણ પણ ઘટી શકે છે.

પોલીસ પરિવાર દ્વારા જિલ્લા મથક ખંભાળિયામાં પોલીસ પરેડ ગ્રાઉન્ડ ખાતે નવરાત્રી મહોત્સવ 2019નું આયોજન કરવામાં આવ્યું હતું. જ્યાં કોઈ પાસ કે પ્રવેશ ફી રાખવામાં આવી નહોતી, જેથી લોકો નિઃશુલ્ક ગરબાનો આનંદ લઈ શકે.

પોલીસ જવાનો, તેમના પરિવાર અને અન્ય ખેલૈયાઓ નવરાત્રી મહોત્સવ ઉત્સાહભેર માણવા અને નિહાળવા પધારે છે. આ નવરાત્રી મહોત્સવની સાથે દેવભૂમિ દ્વારકા જિલ્લા પોલીસ દ્વારા સમાજ ઉપયોગી અનેક સંદેશા આપતા સ્ટોલ ઉભા કરવામાં આવ્યા હતા. જેમાં સરકારની વિવિધ યોજનાઓ મતદાન જાગૃતિ અભિયાન અને સમાજ ઉપયોગી કાયદાકીય માહિતીના ખાસ સ્ટોલ મૂકવામાં આવ્યા હતા.