દ્વારકામાં કોંગી નેતાએ સ્થાનિક લોકોના પ્રશ્નોની નોંધ લઈ સરકાર પર કર્યા પ્રહારો

દેવભૂમિ દ્વારકાઃ કોંગ્રેસ નેતા અર્જુનભાઈ મોઢવાડીયાએ સોમવારે કોંગ્રેસ આગેવાનોને સાથે કલ્યાણપુર તાલુકાની મુલાકાત લઈ સ્થાનિક લોકોના પ્રશ્નોની નોંધ લીધી હતી અને સરકાર પર પ્રહારો કર્યા હતા.

જિલ્લાના કલ્યાણપુર તાલુકાના ખાખારડા, પટેલકા, ગઢકા અને બાકોડી ગામની મુલાકાત અર્જુનભાઈ મોઢવાડીયાએ લીધી હતી અને સ્થાનિક લોકો સાથે ચર્ચા કરી હતી. આ સમયે સ્થાનિક લોકોએ સરકારની કામગીરી વિશે અને સમસ્યાઓની હૈયા વરાળ ઠાલવી હતી.

સ્થાનિક લોકોના જણાવ્યા અનુસાર હાલ ઉનાળાની સિઝનમાં લોકોને અને પોતાના પશુઓને પીવાના પાણીની ખુબ જ મુશ્કેલી ઉભી થઇ રહી છે. પરંતુ સરકાર તરફથી પુરતી સુવિધા મળી નથી અને જીવન જરૂરીયાત માટે મહત્વનું અને પાયાની સુવીધા રૂપે પીવાનું પાણી પૂરતું મળતું નથી. તેમજ જે પાણી મળે છે તે પીવાલાયક નથી. તે પાણી પીવાથી અનેક બીમારીઓનો ભય રહેલો છે.

અછતગ્રસ્ત કલ્યાણપુર તાલુકામાં ઘાસચારો તેમજ પીવાના પાણી અંગે ગ્રામજનોએ પોતાની સમસ્યાની રજૂઆત અર્જુનભાઈને કરી હતી. જિલ્લાના અનેક ગામોમાં પાણીનાં ટેન્કર માત્ર કાગળ ઉપર આવતા હોવાનો આક્ષેપ લોકો દ્વારા કરવામાં આવ્યો હતો. તેમજ ઘાસચારા અંગે ગંભીર પરિસ્થિતિ હોવા છતા તંત્ર નિંદ્રાધીન હોવાનો આરોપ ખેડૂતોએ લગાવ્યો હતો. આ અંગે કોંગ્રેસ નેતા તેમજ કોંગ્રેસના આગેવાનો મેરામણભાઈ ગોરિયા, પાલભાઈ આંબલીયા, યાસીનભાઈ ગજ્જનને લોકોના આ ગંભીર પ્રશ્નોને સાંભળીને ગુજરાત અને કેન્દ્રની સરકાર ઉપર પ્રહારો કર્યા હતા.

તેમજ જણાવ્યું કે, ભુતકાળમાં કોંગ્રેસની સરકારમાં પણ ઓછો વરસાદ અને અછતગ્રસ્ત દિવસો આવ્યા હતા પણ તે સમયે કોંગ્રેસની સરકારે લોકોની સમસ્યાને પોતાની સમસ્યા સમજી પુરી મદદ કરી હતી.