વાપીની અદિત હોસ્પિટલમાં ડોક્ટરની પત્નિનો બિલ બાબતે વીડિયો વાયરલ, પહેલા પૈસા ભરો પછી પેશન્ટને લઈ જાઓ

વાપીની અદિત હોસ્પિટલમાં દાખલ પેશન્ટને વધુ સારવાર માટે સુરત લઈ જતી વખતે બીલને લઈને હોસ્પિટલના તબીબની પત્નિ અને દર્દીના પરિવારજનો વચ્ચેની બબાલનો વીડિયો વાયરલ થતા ચકચાર મચી ગયો છે. સમગ્ર ઘટનાને લઈને દર્દીના પરિવારજનોએ તબીબની પત્નિ સામે ગંભીર આક્ષેપો કર્યા છે અને પ્રશાસન પાસે યોગ્ય તપાસની માગ કરી છે. જ્યારે તબીબે તેને પાયાવિહોણા ગણાવ્યા હતા, તો આરોગ્ય વિભાગે તપાસ હાથ ધરી એક્શન લેવાની ખાતરી આપી હતી.

• ઓક્સિજન પર રહેલા દર્દીના સગા સાથે બોલાચાલી કરતી તબીબની પત્નીનો વીડિઓ વાયરલ
• બિલ ભરો પછી દર્દીને લઈ જવાની દાદાગીરી
• દર્દીના પરિવારજનોએ વીડિઓ વયરલ કરતા ચકચાર

દમણઃવાપીમાં આવેલી અદિત હોસ્પિટલમાં 20 દિવસથી સારવાર હેઠળ રહેલા દર્દીને વધુ સારવાર માટે સુરત લઈ જતી વખતે હોસ્પિટલના તબીબની પત્નિએ દર્દીને પૈસા ભર્યાં વગર નહિ જવા દેવાની અને બીલને લઈને દર્દીઓના પરિવાર સાથે ઝઘડો કરતી હોય તેવો વીડિયો વાયરલ થયો છે. આ વિડીયોને લઈને હાલ વાપીમાં ચકચાર મચી ગયો છે.

આ પણ વાંચોઃમહિલા તબીબ દ્વારા ચલાવાતું ઇન્જેક્શનના કાળા બજારનું કૌભાંડ ઝડપાયું

પેશન્ટને લઈ નહિ જવા એમ્બ્યુલન્સના સ્ટાફને આદેશ કર્યો

વાપીના સોશિયલ મીડિયા ગ્રુપમાં વીડિયો અને પ્રશાસનને અપીલ કરતી વિગતો વાયરલ થઈ હતી. વિડીયોમાં ઓક્સિજન પર રહેલા દર્દીને એમ્બ્યુલન્સમાં લઈ જતી વખતે અચાનક જ એક મહિલાએ આવીને દર્દીના સગાને બિલ ભર્યા વિના પેશન્ટને કેમ લઈ જાઓ છો. પહેલા પૈસા ભરો પછી પેશન્ટને લઈ જાઓ તેવુ ગુસ્સામાં કહ્યું અને સ્ટ્રેચર પર રહેલા પેશન્ટને લઈ નહિ જવા એમ્બ્યુલન્સના સ્ટાફને આદેશ કર્યો છે. જે દરમિયાન દર્દીના સગાઓ સાથે ઉશ્કેરાટ ભર્યું વાતાવરણ ઉભું થાય છે.

અદિત હોસ્પિટલના તબીબની પત્નિ સામે કાર્યવાહીની માગ

દર્દીના સગા પણ આક્ષેપો કરે છે કે, રોજના 50 હજાર સુધીનું બિલ ચૂકવતા આવ્યાં છે, તો આ બિલ પણ ભરી દીધું છે. જે બાદ પેશન્ટના પરિવારજનોએ બીલના પૈસા ચૂકવી દેતા તે પૈસા ગણીને એમ્બ્યુલન્સને જવા દેવાનો ઈશારો કરે છે. હાલ આ સમગ્ર ઘટનાનો વીડિયો વાયરલ થયો છે. જેમાં આ રીતે માનવતા નેવે મૂકી બિલ માટે દર્દીને મરવા મૂકી દેતા અને એમ્બ્યુલન્સને રોકી દેતા ડોક્ટરની પત્નિ સામે પ્રશાસન કડક કાર્યવાહી કરે તેવી માગ કરી છે. સાથે જ આ વિડીયોને વધુને વધુ વાયરલ કરવાની અપીલ કરી છે.

અદિત હોસ્પિટલના તબીબે આક્ષેપોને પાયાવિહોણા ગણાવ્યા

આ વીડિયો વાયરલ થયા બાદ આ અંગે અદિત હોસ્પિટલના ડૉ. તેજસ શાહ સાથે ETV Bharatએ ટેલિફોનિક વાતચીત કરી હતી. જેમાં ડૉ. તેજસ શાહે જણાવ્યું હતું કે, દર્દી તેમને ત્યાં 20-25 દિવસથી વેન્ટિલેટર પર હતાં. જે બાદ સુરતમાં વ્યવસ્થા થતા વધુ સારવાર માટે ત્યાં ખસેડવાની માગણી કરતા અમારો સ્ટાફ તેને સ્ટેચર પર નીચે લાવ્યો હતો. જે દરમિયાન પોતે થોડો આરામ કરવા જતા રહ્યા હતા.

દર્દીના પરિવારજનોને બદલે અન્ય વિઘ્નસંતોષીઓએ આ સમગ્ર ઘટનાને નવું રૂપ આપ્યું

દર્દીઓના સગા દર્દીને એમ્બ્યુલન્સમાં લઈ જવાની તૈયારીમાં હતા, જે જોઈ જતા તેમની પત્નિએ રોક્યા હતા. તેમનું દોઢ લાખનું બિલ બાકી હતું. ઓક્સિજન માસ્ક કાઢી નાખવાના આક્ષેપો તદ્દન ખોટા છે. દર્દીનો હાથ સ્ટેચર બહાર હતો, આવતા જતા કોઈને વાગી ના જાય એટલે એ સરખો કર્યો હતો. આ ઘટનામાં દર્દીના પરિવારજનોને બદલે અન્ય વિઘ્નસંતોષીઓએ આ સમગ્ર ઘટનાને નવું રૂપ આપ્યું છે. જ્યારે અમારી હોસ્પિટલમાં દર્દીને ડિપોઝીટ પછી ભરાવીએ છે પણ સારવાર પહેલા કરીએ છે

CDHOએ તપાસની ખાતરી આપી

આ વાયરલ વીડિયો બાદ વલસાડ જિલ્લાના આરોગ્ય વિભાગના અધિકારી ડો.અનિલ પટેલે ETV Bharat સાથેની વાતચીતમાં જણાવ્યું હતું કે, આ અંગે હજુ સુધી અમારી પાસે વિગતો આવી નથી. પરંતુ આ અંગે તપાસ કરી જરૂર પડશે તો હોસ્પિટલને નોટિસ આપીશું. જ્યારે, વાપી તાલુકા હેલ્થ ઓફિસર ડૉ. મોનિક પટેલે જણાવ્યું હતું કે, આ વીડિયો અને વિગતો મળી છે. હજુ સુધી ઉપરી અધિકારી તરફથી કોઈ આદેશ આવ્યા નથી. જો આદેશ આવશે તો હોસ્પિટલ સામે એક્શન લઈશું.

તબીબોની આવી જ દાદાગીરીનો ભોગ દર્દી અને તેના પરિવાજનોએ બનવું પડે છે

ઉલ્લેખનીય છે કે, કોરોના કાળમાં વાપીમાં તબીબોની દર્દીઓ સાથે અને દર્દીના પરિવારજનો સાથે કરવામાં આવતી દાદાગીરીની આ ગંભીર ઘટના છે. આ પહેલા પણ 21st સેન્ચ્યુરી, નિરામયા હોસ્પિટલ, સંવેદના હોસ્પિટલમાં તબીબોની આવી જ દાદાગીરીનો ભોગ દર્દી અને તેના પરિવાજનોએ બનવું પડ્યું છે.

આ પણ વાંચોઃવડોદરાની SSG હોસ્પિટલમાં દર્દીનું ઓપરેશન, ડોક્ટરો હડતાલ પર

આ પહેલા પણ માનવતા નેવે મૂકી ચુક્યા છે હોસ્પિટલ સંચાલકો

સરકારના નિયમ કરતા વધુ બિલ વસૂલવા, બિલ માટે દર્દીના મૃતદેહને નહિ સોંપવા, બિલ માટે કાર જમા કરાવી લેવા જેવી ઘટનાઓ બની ચૂકી છે. ત્યારે વહીવટીતંત્ર અને આરોગ્ય વિભાગ આ અંગે યોગ્ય તાપસ કરી, જો દોષિત જણાય તો આવા તબીબો અને બિલ માટે માનવતા નેવે મુકતી તબીબની પત્નિ સામે કડક એક્શન લે તે જરૂરી છે.